Motorista Transporte Públiku Hera-Metinaro Sei Halo Greve Hasoru DNTT

Motorista sira ameasa sei halo manifestasuan hasoru DNTT.

 Díli, 18 Juñu 2026 (RAFA.TL)- Motorista sira transporte públiku diresaun Hera too Metinaro hamutuk ho motorista mikrolete 01 to’o 02 sei hala’o greve no protesta hasoru desizaun Diresaun Nasionál Transportes no Terrestres (DNTT) ne’ebé hasa’e taxa administrativu ba inspesaun no lisensiamentu transporte sira.

Responsavel motorista sira, Valentino Ximenes, liu husi Konferénsia ba Imprensa  iha área Estasionamentu transporte públiku iha Becora, Kinta (18/06/2026), husu ba DNTT atu fó klarifikasaun ba públiku kona-bá razaun aumentu taxa inspesaun no lisensa ba transporte públiku no privadu sira.

Sira mós husu ba Governu bainhira atu hasae taxa presiza haré mós ho situasaun ekonomiku povu nian, liu-liu rendimentu ne’ebé iha.

“Ami husu ba DNTT atu halo sosializasaun ba Dekretu-Lei nú. 17/2026 de 6 de Maio, tanba aplika taxa ne’ebé aas, halo ami povu kiik sente todan tebes, tanba ami laiha rendimentu sufisiente ba moris loro-loron bainhira ami nia prekupasaun refere laiha resposta ruma maka ami kondutor mikrolet sira sei halo greve no asaun pasifiku hasoru DNTT.” Hatete Valentino Ximenes.

Motorista transporte publiku sira ne´e  husu mos ba autoridade sira Governu nian liu husi DNTT bele loke espasu diálogu ho motorista no parte interessada sira atu buka solusaun ne´ebé diak ba ema hotu.

Sira husu mós ba DNTT no Polísia Tranzitu, ne’ebé hala’o servisu iha estasionamentu transporte públiku iha Bekora atu tau atensaun ba karreta privadu sira ne’ebé tula pasazeiru diresaun Díli ba Hera no Metinaro nian, tanba tuir regra ne’e mikrolete sira ne’ebé halai diresaun Dili ba Hera no metinaro mak bele tula pasazerus sira.

Iha fatin hanesan, motorista Agustinho Perreira, informa katak sei haruka ona  karta ba Komandu PNTL Munisípiu Díli, atu husu autorizasaun para hato’o sira nia preokupasaun ba Taxa dministrativu ne´ebé husi DNTT.

“Ami sei halo karta ida ba Polísia, hein rezultadu husi ne’eba maka ami sei tun iha segunda oin, maibé depende iha Polísia, bainhira ami nia asaun ne’e laiha solusaun maka sei kontinua tamba ami la satisfas tanba ami nia rendementu loron-loron ne’e ami halai ne’e ladun hetan rendementu diak.” hatete Agustinho Perreira.

Motorista ne’e mos promete sei mobiliza motorista sira ne’ebé lori transporte públiku ne´ebé halo serkulasaun iha Díli no mós  ho bus no Carry sira atu halo asaun pasifiku hasoru DNTT.

Jornalista: João CarlosEditór: Vito Salvadór