MNEK Propoin Millaun 1.2 USD Estabelese Embaixada Foun iha Papua Guiné, Rúsia, Fransa ho Alemaña

Vise-Ministra Negósiu Estranjeiru no Kooperasaun, Jesuína Maria Ferreira Gomes.

Díli, 20 Outubru 2026 (RAFA) – Ministériu Negósiu Estranjeiru no Kooperasaun (MNEK) propoin tan millaun 1.2  USD atu estabelese embaixada foun iha Papua Nova Guiné, Rúsia, Fransa no Alemaña iha tinan  2027.

Vise-Ministra Negósiu Estranjeiru no Kooperasaun, Jesuína Maria Ferreira Gomes,  iha Parlamentu Nasionál, Segunda ne’e, hateten proposta orsamentu ne’e aprezenta ona ba Komisaun B Parlamentu Nasionál, propoin orsamentu estimativa hamutuk millaun 34,93 USD iha Orsamentu Jeral Estadu (OJE) 2027, no husu repoin tan millaun 1.2 USD ne’ebé hasai husi proposta orsamentu inisiál, hodi suporta kustu operasionál no planu abertura embaixada foun haat iha tinan oin.

Nia mós relata iha aprezenta ba Komité Revizaun Orsamentu (KRO) millaun 35 USD. Maibé, iha prosesu diskusaun no revizaun, montante ne’e reduz millaun 1,2 USD.

Iha audénsia ne’e, membru Komisaun B no reprezentante MNEK halo diskusaun kona-bá ezekusaun orsamentu tinan ida-ne’e, inklui preokupasaun deputadu sira nian kona-ba ezekusaun kapitál menór ne’ebé seidauk atinje nivel ne’ebé espera.

Vise-Ministra ne’e esplika katak ezekusaun kapitál menór la’ós de’it envolve servisu sentrál iha Ministériu, maibé inklui mós embaixada no misaun diplomátika Timor-Leste nian iha rai li’ur.

Nia hatutan katak, tuir dadus iha sistema, ezekusaun ba kapitál menór foin atinje 36%. Maibé, númeru ne’e seidauk reprezenta ezekusaun tomak, tanba informasaun balun husi embaixada sira iha rai li’ur seidauk tama hotu iha sistema baze-dadus. Tanba ne’e, bainhira informasaun hotu tama ona iha sistema, númeru ezekusaun bele hatudu rezultadu ne’ebé loos liután.

Nia esplika katak orsamentu adisionál ne’e importante atu kobre kustu operasionál, liuliu ba misaun diplomátika Timor-Leste nian hamutuk 36 iha rai li’ur, inklui gastu eletrisidade, bee, komunikasaun no nesesidade operasionál seluk.

Ba tinan 2027, MNEK sei hala’o programa prinsipál rua, mak polítika externa no funsionamentu institusionál. Programa rua ne’e sei dezenvolve liuhusi subprograma 11 no atividade 16, atu asegura implementasaun prioridade ministeriál nian.

Iha proposta orsamentu ne’e, MNEK mós inklui dotasaun ba ASEAN, ne’ebé mai husi orsamentu jerál Governu ho montante besik millaun 5 USD,  no dotasaun ba CPLP ho montante millaun 2 USD.

Proposta orsamentu MNEK ba 2027 ne’e aprezenta ona ba Komisaun B Parlamentu Nasionál, atu hetan konsiderasaun no diskusaun iha prosesu aprovasaun OJE ba tinan fiskál 2027.

Ezekusaun Orsamentu Jerál Estadu MNEK ba tinan 2026 atinje ona pursentu 74, ne’ebé kompostu husi kategoria tolu, mak saláriu no vensimentu, bens de servisu, no kapitál menór.

Jornalista: Cesarina de Carvalho