Minitériu Interiór Halo Uluk Promosaun Deviza Ba Ofisiál Superiór PNTL Molok Diskute Komandante Jerál Foun

Ministru Interiór (MI), Francisco da Costa Guterres. Imajen/Rafa.tl

DILI, RAFA.tl- Ministériu Interiór (MI) iha ona planu no prefere halo uluk promosaun deviza ba ofisiál Superiór Polísia Nasionál Timor-Leste (PNTL) molok deskute kandidatu ba Komandante Jerál foun PNTL.

Ministru Interiór (MI), Francisco da Costa Guterres esplika, promosaun ba ofisiál Superiór sira ne’e besik ona, ne’ebé hein de’it desizaun husi Konsellu Ministru. Maibé  kona-bá dadus ofisiál susperiór Polísia nian  seidauk fiksa, na’in hira mak atu promove.

Nia afirma, kona-bá kandidatu ba Komandante Jerál PNTL foun, prosesu ne’e sei hein,  semana ida promosaun sira ne’e la’o tiha lai mak haré,  foin tama ba ida-ne’e.

“Semana oin, prontu ami espera katak ami aprezenta ba Konsellu Ministru para hetan aprovasaun para ita avansa ona. Ha’u la fiksa, maibé ba ida-ne’e ami haré tiha lai  estrutura. Ba ida-ne’e, ha’u seidauk bele adianta buat ruma,  tanba hein Konsellu Ministru aprova tiha lai mak ha’u sei fó hateten fali ba imi vaga ne’e hira. Ha’u agora adianta tiha ba imi depois mai iha ne’e mak Konsellu Ministru la konkorda vaga ida-ne’e, entaun ha’u bosokten, entaun di’ak liu hanesan ne’e, hein Konsellu Ministru aprova lai,” Ministru Interiór Francisco da Costa Guterres ba jornalista sira hafoin partisipa reuniaun Konsellu Ministru iha Palásiu Governu, Kuarta (14/01/2026).

Governante ne’e argumenta katak, jestaun atu halo promosaun ba ofisiál superiór PNTL sei presiza diploma husi Konsellu Ministru, tanba ne’e ministériu sei lori ba aprezenta iha reuniaun Konsellu Ministru hafoin deside.

“Kestaun ne’e sei presiza diploma ruma husi Konsellu Ministru, tanba ne’e mak ha’u hein Konsellu Ministru ko’alia, los ona, prontu ona, mak ha’u fó hateten imi, ne’e presiza ema na’in hira halo promosaun, ne’ebe mekanizmu ba promosaun ne’e ha’u  sei lori ba aprezenta iha  Konsellu Ministru,” Nia informa.

Ministru Interiór subliña liután katak, kona-bá kandidatu foun ba Komandante Jerál PNTL buat hotu sei liu husi tramitas legál no lei sira ne’ebé vigór iha Timor-Leste no tuir mos matadalan no estatutu PNTL nian.

Fó hanoin fali katak Komandante Jerál PNTL atuál Komisáriu Jerál Henrique da Costa ho nia Segundu Komandante Jerál Komisáriu Pedro Belo, simu posse husi Prezidente Repúblika, José Ramos-Horta, iha loron 27 fulan-Marsu tinan 2023, hodi lidera instituisaun PNTL ba períodu tinan-tolu  (2023-2025).

Nomeasaun ne’e bazeia ba Rezolusaun Governu Nu.11/2023 de 24 fulan-Marsu hodi nomea Superintendente Xefe Henrique da Costa ba postu Komisariu-Jerál hodi dezempeña funsaun hanesan Komandante Jerál PNTL no Rezolusaun Governu Nu.12/2023 de 24 fulan-Marsu 2023 promove no nomeia Superintendente Xefe Pedro Belo ba postu Komisáriu hodi dezempeña funsaun hanesan Segundu Komandante Jerál.

Reportajen ekipa Rafa.tl