Ministru Miguel Manetelu Hasai Dexpasu Ba AACTL Bazeia Ba Pedidu MNEK Hodi Autoriza Jet Privadu Cessna C700 Aterra iha AIPNL

Ministru Transporte no Komunikasaun (MTK), Miguel Marques Gonçalves Manetelu.

Díli, 08 Jullu 2026 (RAFA.TL)- Ministru Transporte no Komunikasaun  (MTK),  Miguel Marques Manetelu, rekoñese  nia hasai despaxu ba Autoridade Aviaun Sivíl Timor-Leste (AACTL) bazeia ba pedidu husi Ministériu Negósiu Estranjeiru no Kooperasaun (MNEK) hodi fó autorizasaun ba Jet privadu ho tipu Cessna Citation 700 Longitude (C700) aterra iha Aeroportu Internasionál Nicolau Lobato, Kuarta 01 Jullu 2026.

“Prosedimentu administrativu ne’e loos, tanba pratika baibain ne’e pedidu sira aterrizajen aviaun ne’e haruka ba Ministériu Negósiu Estranjeiru no Kooperasaun (MNEK) no  MTK simu nota verbal husi MNEK bainhira iha ona nota verbal husi MNEK ami hatene katak buat hotu ne’e loos ona. Entaun, ha’u hasai despaxu ba AACTL para prosesa, ne’ebé haré husi prosedimentu ka prosesu administrativu ne’e logiká, buat hotu ne’e la’o tuir dalan tanba despaxu ne’ebé ha’u hasai ne’e tanba nota verbal ne’ebé mai husi MNEK,” Ministru Miguel Manetelu informa hodi responde jornalista sira iha Palasiu Governu, Kuarta ne’e.

Membru Governu ne’e hatutan prosesu administrativa ne’e loos, pedidu sira mai husi nasaun ne’ebé de’it ba aviaun ida atu aterra ka tuun iha aeroportu ne’e pedidu ne’e haruka ba MNEK, la’ós haruka ba MTK.

Nia hatutan kona-bá jet ida tuun ne’e iha pedidu ba MNEK no MNEK haruka nota verbal ba MTK. “Ha’u hanesan ministru ha’u hasai despaxu baibain ha’u hakerek hanesan ne’e Prezidente AACTL prosesa tuir regra no prosedimentu ne’ebé vigór, ha’u nia despaxu ha’u sempre hakerek lia-fuan ida-ne’e, ne’ebé prosesu ne’e administrativamente loos autorizasaun husi AACTL tanba nota verbal ne’e mai husi MNEK.”

Nia hatutan kona-bá buat sira seluk investigasaun sei la’o, no akompaña katak husi autoridade  Polísia sira hasai ona deklarasaun katak prosesu investigasaun ne’e la’o hela.

“Aviaun ne’e para duni kalan ida, AACTL hamutuk ho entidade sira seluk ba prende aviaun ne’e, la sala iha Kuarta-loraik, 01 Jullu 2026, aviaun la semo duni, ha’u iha hela serimonia embaixada Amérika nian, derrepenti hetan informasaun katak tuir pedidu bainaka husi Prezidente nian ne’e laloos. Entaun, ha’u telefone kedan ba AACTL atu prende aviaun ne’e, sé imi akompaña didi’ak karik aviaun ne’e prende duni,” nia esplika.

Governante ne’e afirma Prezidente AACTL agora daudaun hala’o hela servisu iha Munisipiu Covalima, no nia espera katak bainhira Prezidente AACTL fila mai MTK husu nia para bele bolu jornalista hodi bele esplika prosesu investigasaun ne’ebé mak AACTL rasik ho PNSIC hala’o ona ba kazu refere.

Nia afrima objetivu jet privadu ne’e mai atu lori ema no atu tula ema, tuir karta pedidu ne’ebé hatete dehan bainaka Prezidente nian.

“Prosedimentu administrative ne’e loos hela soké identifika katak pedidu ne’e mak iha problema tanba temi Prezidente Repúblika nia naran tanba ne’e mak halo investigasaun ne’e, ema hotu bele deskonfia ema seluk, ita mós bele deskonfia ha’u, ha’u mós bele deskonfia ita, ha’u hakarak haree prosedimentu  dokumentu ami bele hatudu,” nia argumenta.

Jornalista: Zita Menezes/Editór: Vito Salvadór