Ministru Gil Oan Soru Konsidera La Fasil Lori Fila Restus Motartais Prezidente Nicolau Lobato

Ministru Asuntu Kombatentes Libertasaun Nasionál (MAKLN), Gil da Costa Monteiro "Oan Soru".

Díli, 26 Agostu 2026 (RAFA)- Ministru Asuntu Kombatentes Libertasaun Nasionál (MAKLN), Gil da Costa Monteiro “Oan Soru”, konsidera la fasil lori fila resutus mortais prezidente  Nicolau Lobato nian mai Timor-Leste.

Membru governu ne´e argumenta katak, valorizasaun ba erói nasionál ne’e la’ós depende de’it ba hetan ka la hetan Sauduzu Prezidente Nicolau Lobato nia restus mortais tanba prosesu atu hetan fali la hanesan foti sasán iha Atauro.

“Restus mortais Saudozu Nicolau Lobato, ita boot sira hanoin fasil hela, dala ruma hanoin Saudozu Nicolau nia ruin karik iha, Ministru ida Gil ne’e bele hateten Jenerál sira Indonézia fó ohin. Agora ita-boot  (jornalista sira)  ne’e la moris iha tempu funu ne’ebé la sente gostu ida ne’eba nian. La fasil funu maluk ida mai haraik aan hodi entrega ne’e tuir ita nia gostu polítika sira ne’ebé ita hasai, la fasil,” Ministru Gil da Costa “Oan Soru” Oan Soru  hateten hodi responde jornalista sira iha Palásiu Gvoernu, Kuarta-ne’e.

Governante ne´e hatutan,  parte instituisaun estadu ne’ebé de’it halo esforsu hodi konsege, agradese, tanba ne’e mak Timoroan sira nia kontribuisaun. Maibé, loloos ne’e Jornalista sira husu hanesan membru governu, ministru atu argumenta katak valorizasaun ne´e importante liu.

“Atu hateten de’it ba públiku katak, buat ida merese ba sira ne’e valorizasaun. La’ós ruin hetan ka la hetan, la presiza, valorizasaun ne’e mak importante, la’ós tanba ruin,” Ministru Gil Oan Soru hateten. .

Oan Soru esplika, esforsu ba saudozu Nicolau Lobato nia restus mortais ne´e halo bebeik no kontinua hela desde Timor-Leste restaura nia independensia atinze ona tinan 24, to’o agora la fasil, Prezidente hira mak troka ona. Tanba, ne’e deklarasaun polítika ema ida-idak bele hasai, mais mai MAKLN nia pozisaun ida katak, ruin hetan mós valorizasaun tenke iha, la hetan mós tenke valorizasaun ne’e mak konseitu prinsipál.

“Karik dala ruma kasar uitoan ne’e ha’u dehan, se ema lakohi hatudu fatin karik hanoin Timor bele invade fali Indonézia hodi foti ka, Timor nia devér hanesan Timor-oan mak ne’e prepara konseitu atu valoriza ita nia ema sira ne’ebé mate iha funu ba indepedensia, tanba sira mate mak Timor-Leste ukun aan,” nia konklui.

Jornalista: Cristina Ximenes