Ministru Estadu Emiradu Árabe Sei Vizita Timor-Leste

Enkaregadu Negósiu Embaxada Emiradu Árabe Unidu (EAU), Shaima Salem Alhebsi, hasoru malu ho Prezidente Repúblika José Ramos-Horta iha Palásiu Prezidensiál, Tersa 18 Agostu 2026.

Díli, 18 Agostu 2026 (RAFA)- Enkaregadu Negósiu Embaxada Emiradu Árabe Unidu (EAU), Shaima Salem Alhebsi, hasoru malu ho Prezidente Repúblika José Ramos-Horta, hodi ko´alia kona-ba preparativu sira vizita Ministru Estadu Emiradu Árabe Unidu mai Timor-Leste iha fulan-Agostu-ne’e.

Enkaregadu Negósiu, Shaima Salem Alhebsi hateten, nia kontente tebes hasoru Prezidente Repúblika no Emiradus Árabe Unidu mak belun di’ak ba povu Timor ho apoiu sira no relasaun amizade sira ne´ebé país rua ne´e fahe ba malu.

“Objetivu prinsipál iha sorumutu ne´e mak atu informa ba Xefe Estadu kona-bá vizita ofisiál ami nia Ministru Estadu nia vizita istórika dahuluk mai Timor-Leste, ne’ebé marka atu akontese iha finál fulan-Agostu-ne’e, hodi hatudu kompromisu forte husi governu EAU nian atu hametin liután relasaun bilaterál,” Enkaregadu Negósiu, Shaima Salem Alhebsi  informa ba jornalista sira iha Palásiu Prezidénsia, Tersa-ne’e.

Enviada ne’e mós fó hatene ba Xefe Estadu Timor-Leste kona-bá resesaun amizade Timor-Leste no EAU ne’ebé sei mai, no  Ramos-Horta aseita ona atu onra eventu ne’e ho ninia prezensa.

Iha eventu ne’e sei iha serimónia espesiál ida hodi fó prémiu ba estudante timoroan sira ne’ebé hatudu sira-nia rai ho kriatividade liuhusi projetu vídeu kolaborativu entre Embaixada EAU no Ministériu Edukasaun.

Alhebsi fó sai mós katak parseria ne’ebé buras entre nasaun rua ne’e la’ós de’it iha nível Governu ba Governu, maibé mós to’o relasaun entre povu no fó kbiit ba foin-sa’e sira iha Timor-Leste, hodi loke dalan ba projetu sira ne’ebé fó fuan liután iha futuru.

Jornalista: Cristina Ximenes