Ministru Agio Pereira Laiha Komentáriu Ba Notifikasaun MP Ba Kazu Abuzu Poder no Administrasaun Danosa

Ministru Prezidénsia Konsellu Ministru (MPCM, sigla portugé), Hermenegildo Cabral Pereira (Agio Pereira). Imajen/PCM

Díli, 12 Abríl 2026 (RAFA.tl),–Ministru Prezidénsia Konsellu Ministru (MPCM, sigla portugé), Hermenegildo Cabral Pereira (Agio Pereira), laiha koméntariu ba notifikasaun husi Ministériu Públiku (MP) ba kazu abuzu poder no administrasaun danosa.

“Ha’u laiha komentáriu no ha’u laiha komentáriu tan,” Ministru Agio Pereira hateten hodi responde Rafa.tl iha sala VIP Aeroportu Internasionál Prezidente Nicolau Lobato, Díli, Domingu (12/04/2026).

Ministru Agio Pereira ne’ebé atu halo viajen ba Austrália ho aviaun Qantas Austrália liu husi Aeroportu Internasionál Prezidente Nicolau Lobato, la hatan pergunta konfirmasaun sira husi jornalista Rafa.tl mézmu husu tanba saida mak laiha komentáriu.

Ministru Agio Pereira iha tuku 14:50 Otl, ho karreta Estadu ho xapa matrikula 00-004 G  to’o iha área estasionamentu VIP iha Aeroportu Internasionál Prezidente Nicolau Lobato atu halo viajen ba Austrália ho aviaun Qantas. Nune’e, bainhira tuun husi karreta atu hakat tama ba sala VIP aeroportu nian, jornalista Rafa.tl aprezenta aan hodi husu  pergunta konfirmasaun ba karta husi Ministériu Públiku atu presta deklarasaun dilijensia tanba deskonfia halo abuzu poder no administrasaun danosa, maibé Ministru Agio Pereira hatan deit dehan, laiha komentáriu.

Hanesan Rafa.tl públika ona iha Sesta, 10 Abríl 2026, katak Ministériu Públiku (MP), liu husi karta ho Nu. Ref.225/GCCCCO/PGR/III/2026, solisita atu rekiza ba membru Governu, Ministru Prezidénsia Konsellu Ministru (MPCM), Hermenegildo Cabral Pereira (Agio Pereira) atu presta deklarasaun dilijensia tanba deskonfia halo abuzu poder no administrasaun danosa.

Karta Ministériu Públiku nian  ho NUC 0038/26.PGGCC ne’ebé asina husi Prokuradór Matias Soares, haktuir, iha GSKKKO iha prosesu ida ne’ebé mak rejistadu nu’udar inkeritu ba krime Abuso de poder e Administracão danosa, P. e P. Art. 85 da lei N.7/2020 de 26 de Agosto e art 274 CP, kontra suspeitu Hermenegildo Cabral Pereira (Agio Pereira) Ministru Prezidensia Konsellu Ministru (MPCM), lezadu Estadu RDTL, atualmente iha hela faze investigasaun.

Liuhusi karta Ministériu Públiku nian ne’e haktuir ba instrusaun serbisu númeru 03/PGR/2022, iha klauzula 1, solisita ba membru Governu, Hermenegildo Cabral Pereira (Agio Pereira) atuál  Ministru Prezidénsia Konsellu Ministru (MPCM), atu marka dilijensia iha  loron 10 Abríl 2026, tuku 14h30 to’o remata, iha Gabinete Kombate Korrupsaun (GCC, sigla portugés) kualidade hanesan suspeitu. Maibé  Ministru Agio Pereira la marka prezensa no tuir informasaun katak Ministru Agio Pereira husu ba Prokuradoria Jerál Repúblika atu adia audiénsia tanba okupadu ho oráriu servisu sira, inklui viajen ida ne’ebé planeadu ba rai-li’ur, Sábadu, 12 Abríl 2026.

Notifikasaun Ministériu Públiku  nian ba Ministru Agio Pereira ne’e kona-ba “posivel krimi sira abuzu poder nian”, ne’ebé haktuir hosi auditória ida hosi Tribunál Kontas iha tinan 2024.

Notifikasaun temi espesifikamente relatóriu 2/2024 hosi Tribunál Kontas, relasiona ho auditória ida husi TIMOR GAP iha tinan  2017 to’o tinan 2019, ne’ebé, entre asuntu sira seluk, análize nesesidade ba aprovasaun anteriór hosi Tribunál Kontas ba transferénsia públika sira ba empreza, ne’ebé baibain koñesidu hanesan akordu  Subvensaun Públika nian.

Iha relatóriu ne’e, ne’ebé konsulta hosi Rafa.tl, Tribunál Kontas konsidera katak la haree ba transferénsia sira ne’ebé define ona iha Orsamentu Estadu ka lae, “kontratu sira ho natureza saida de’it ne’ebé halo husi entidade sira ne’ebé sujeita ba jurizdisaun Tribunál Kontas nian ne’ebé liu valór millaun lima dolar amérika sujeita ba fiskalizasaun prévia husi Tribunál Kontas nian”.

Durante períodu ne’ebé maka relatóriu ne’e kobre, asina ona akordu tolu, hamutuk millaun US$40,7, ne’ebé maka transfere maizumenus millaun US$38,75; millaun US$11,9 tuir instrusaun husi Ministru Rekursu Naturais no Minerais (MPRM) iha tempu ne’ebá, Alfredo Pires, millaun US$9,95 tuir instrusaun husi Ministru Hernâni Coelho, iha momentu ne’ebá, no millaun US$19 iha tempu ne’ebá Ministru Agio Pereira.

Reportajen Ekipa Rafa.tl