Ministru Agio Pereira La Fó Komentáriu Ba Asaun Sivíl Indemnizasaun Millaun 4,8 USD

Ministru Prezidénsia Konsellu Ministru, Hemenegildo Augostu Cabral Pereira Alves “Agio Pereira”. Imajen/gov.tl

Díli, 18 Abríl 2026 (RAFA.tl)—Ministru Prezidénsia Konsellu Ministru, Hemenegildo Augostu Cabral Pereira  Alves “Agio Pereira” kontinua nonook hodi la fó komentáriu kona-bá asaun sivíl indemnizasaun danu morál no materiál ho montante  millaun 4,8  dólar amerikanu (USD) ne’ebé  Vise-Ministru Justisa, Paulo Manuel da Silva dos Remédios halo kontra nia.

Notísia Relevante: Vise-Ministru Justisa Sei Aprezenta Asaun Sivíl Ba Indemnizasaun Danos Morais Hasoru Agio Pereira

Ministru Agio Pereira ne’ebé foin to’o fali Timor-Leste husi Austrália, Sábadu (18/04/2026), iha sala VIP Aeroportu Internasionál Prezidente Nicolau Lobato, lakohi fó komentáriu konfirmasaun ho jornalista sira kona-bá asaun sivíl  ne’ebé  Vise-Ministru Justisa, Paulo Manuel da Silva dos Remédios prosesa iha Tribunál hasoru nia.

Ministru Agio Pereira ne’ebé jornalista sira hasoru iha odamatan sala VIP Aeroportu Internasionál Prezidente Nicolau Lobato, hodi husu konfirmasaun ba kestaun asaun legál hosi Vise-Ministru Justisa, Paulo Manuel da Silva dos Remédios, mas nia nonook hodi foti liman de’it no hakat liu ba sa’e karreta.

Ministru Agio Pereira to’o iha Aeroportu Internasional  Prezidente Nicolau Lobato, hale’u tuku 14:50 Otl  ho Aviaun komersiál Qantas.

Fó hanoin fali katak Vise-Ministru Justisa, Paulo Manuel da Silva dos Remédios, liuhosi nia advogadu Agostinho de Jesus, halo asaun ida kona-bá danu morál no materiál hasoru Ministru Prezidénsia Konsellu Ministru, Agio Pereira, ne’ebé nia husu indemnizasaun hamutuk ho valor dólar amerikanu millaun 4,8.

Intensaun husi prosesu legal ne’e, tuir  karta ida husi advogadu Paulo Remédios nian ne’ebé Rafa.tl asesa, haktuir  katak iha fulan-Setembru, tinan kotuk, Agio Pereira akuzadu Vise-Ministru no nia família sira “envolvidu iha negósiu scams online”.

Iha karta  advogadu Agostinho de Jesus reprezenta legal  Vise-Ministru Justisa, Paulo Manuel da Silva dos Remédios, husu ba Tribunal Judisiál Primeira Instásia Díli (TJPID)  atu halo “notifikasaun judisial avulsa”, no mós akuza Agio Pereira katak nia fahe “iha Palásiu Governu no iha prasa públika kopia pasaporte husi rekerente no nia família”.

Tuir advogadu, “faktu sira ne’e viola direitu imajan (…) tanba sira falsu, ofensivu, iha konteúdu rasista, xenofobia no kalúnia hasoru naran di’ak rekerente  Vise-Ministru Justisa, Paulo Manuel da Silva dos Remédios no nia família nian.

Advogadu Agostinho de Jesus  konfirma katak nia parte  hakarak “notifica requerido” (Agio Pereira) katak “konduta ne’e sei lori ba responsabilidade sivíl iha Tribunál kompetente (…) atu halo asaun sivíl kona-bá kondenasaun no indemnizasaun, ba danu morál no materiál ho valor besik millaun 4,8 dólar amerikanu”.

Notifikasaun ne’e, tuir advogadu, iha objetivu atu “interrompe preskrisaun direitu rekerente nian”.

Iha kazu ida ne’e, Agio Pereira hetan informasaun judisiál katak rekerente, Paulo Remédios, konsidera nia konduta hanesan asaun ne’ebé estraga nia, no nia hakarak responde, liu-liu ho asaun responsabilidade sivíl.

Prosesu sira ba estragu morál no materiál (donu moral no materiál) maka prosesu legál sira iha ne’ebé ema ida (naturál ka legál) buka kompensasaun finanseira hodi hadi’a  ka repara lakon ne’ebé nia sofre tanba ema seluk nia sala.

Jornalista: João Carlos/Editór: Vito Salvadór