Ministra Élia Amaral Aprova Ona Transferensia Pasiente Marilio Santos Lay Ba Malázia

Pasiente Marilio Sousa dos Santos Lay. Imajen/espesiál

Díli, 11 Agostu 2026 (RAFA) –Ministra Saúde, Élia A.A Amaral, iha fulan-kotuk, aprova ona tansferensia pasiente  Marilio Sousa dos Santos Lay ba halo tratamentu, maibé to’o agora hein hela konfirmasaun husi ospitál iha Malázia ne’ebé pasiente atu hlao tratamentu ba.

 Diretóra Nasionál Apoiu Servisu Hospitálar iha Ministériu Saúde, Santina Gomes, Tersa-ne’e,  klarifika katak parte ospitál iha Malázia ne’ebé atu halo tratamentu ba  pasiente Marilio Sousa dos Santos Lay  seidauk  fó konfirmasaun, nune’e seidauk bele sai husi Timor-Leste.

“Ministra Saúde halo tiha ona aprovasaun iha fulan kotuk liubá. Maibé, ospitál  iha Malázia ne’ebé atu halo tratamentu ba pasiente Marilio Sousa dos Santos Lay seidauk fó konfirmasaun para nia atu sai. Mézmu nune’e, Ministériu Saúde kontinua buka meius oinsá mak pasiente ne’e bele hal otranferensia iha semana ida-ne’e nia laran,”  Santina Gomes hateten hodi responde jornalista sira iha nia servisu fatin.

Husi sorin seluk, Rosa Santos Lay reporezentante família  husi pasiente Marilio Sousa dos Santos Lay, suzere ba Governu atu bele aselera tranferensia.

Rosa Santos Lay  hateten sira-nia oan Marilio Sousa dos Santos Lay  hetan moras  dezde iha tinan 2025 no mai beibeik konsulta iha Ospitál Nasionál Guido Valadares (HNGV) no ikus mai doutor sira ne’ebé tau-matan ba nia moras ne’e husu atu halo transferensia ba rai-li’ur tanba ekipamentu ne’ebé atu rekupera moras ne’e iha HNGV la sufisiente.

“Iha fulan-Setembru, tinan kotuk ne’e, ami komesa mai halo konsulta  hela de’it, no tama iha fulan-Novembru nia komesa baixa ona no ida-ne’e di’ak tiha sai fali no tama sai ospitál ida-ne’e,    ikus mai dotór sira dehan nia tenke ba halo tratamentu iha rai-li’ur,”  Rosa Santos Lay   hateten.

Ho prosesu burokrasia  ne’ebé atraza no han tempu loos, maka  parte família suzere atu  Governu hadi’a sistema no mekanizmu sira, liuliu fotelese servisu no ekipamentu saúde nian iha ospitál sira  iha rai-laran atu  bele salva Timoroan sira-nia vida.

Nia hatutan família konfirma beibeik ona ho parte saúde. Maibé, sira husu atu família pasensia hodi hein rezultadu tanba dokumentu ba pasiente refere atu transferensia ba Malázia ne’e Ministra Saúde asina ona.

“Ministra aprova ona, hein ospitál ne’ebé pasiente atu ba konsulta ne’e seidauk iha resposta tanba ne’e husu atu ami pasensia, no ami husu bele buka dalan seluk atu ba fali ospitál seluk ka lae, maibé sira dehan governu Timor-Leste halo ona akordu ho governu Malázia no ospitál KPG Malázia entaun ita labele muda fali ba fatin seluk só bele pasensia hodi hein,” Rosa Santos Lay    haktuir.

Jornalista: Cesarina de Carvalho