Ministériu Saúde Halo Klarifikasaun Kona-bá Tratamentu Saúde Eis-PR Lú-Olo To’o Hakotu Iis iha Ospitál Prince Court Malázia

Ministériu Saúde ho Embaixadór Timor-Leste ba Malázia Lisualdo Gaspar halo klarifikasaun kon-bá tratamentu saúde eis-PR Lú-Olo to'o hakotu iis iha Ospitál Prince Court iha Kuala Lumpur.

Díli, 27 Juñu 2026 (RAFA.TL)- Ministériu Saúde liu husi Médiku sirurjiaun ne’ebé akompaña eis-Prezidente Repúblika, Francisco Guterres Lú-Olo ba iha Ospitál Prince Court iha Kuala Lumpur,  Malázia, klarifika katak eis-Xefe Estadu halo operasaun iha loron 09 fulan-Juñu iha Malázia no hela iha kuidadu intensivu (ICU) durante loron 12 no la rekupera to’o hakotu iis iha kalan 21 fulan-Juñu liubá.

Informasaun ne’e hato’o iha konferénsia imprensa husi médiku sirurjiaun Ospitál Nasionál Guido Valadares, Alito Soares, ne’ebé akompaña saudozu Lú-Olo husi Díli to’o nia vida remata iha Sentru Médiku Prince Court iha Kuala Lumpur, haten Lú-Olo hetan tratamentu antes nia transferénsia.

Alito Soares esplika katak, tuir konsulta husi ekipa kardiolojia iha Ospitál Guido Valadares, identifika ona kondisaun médiku oioin, no kazu ne’e submete ba junta médiku ida, espesifikamente liuhosi kanál ne’ebé dezignadu ba veteranu sira.

“Aprovasaun ba transferénsia hetan iha loron 20 fulan-Maiu tinan 2026. Loron tuirmai, konsellu hasoru malu, aprova prosesu, no haruka ba Ministru Saúde, ne’ebé fó aprovasaun kedas. No Saída inisialmente marka ona ba loron 22 fulan Maiu, maibé Saudozu Lú-Olo rasik husu atu adia to’o loron tuir mai. Tanba ne’e, evakuasaun médiku emerjénsia nian akontese iha loron 23 fulan-Maiu. Viajen ba Malázia la’o ho di’ak,” Alito Soares  informa ba jornalista sira liu husi konferénsia Imprensa iha  Palasiu das Cinzas, Díli, Sábadu (27/06/2026).

Médiku ne’e haktuir bainhira to’o iha Malázia, ekipa mediku transporta kedas ho ambulánsia ba Sentru Médiku Prince Court, iha ne’ebé nia tama no hetan tratamentu husi ekipa multidisiplinár ne’ebé inklui sirurjiaun vaskulár, kardiólogu, intensivista, anestesiólogu, pulmonólogu, no nefrolójiku.

“Ekipa ne’ebá hala’o avaliasaun kle’an ida no deside atu kontinua ho preparasaun pré-operatóriu sira. Planu maka atu avansa ho sirurjia, ne’ebé ikusmai hala’o iha loron 09 fulan-Juñu tinan 2026,” médiku ne’e relata.

Tuir operasaun, ekipa médiku deside hodi mantein Lú-Olo iha kuidadu intensivu. Maibé, eis Prezidente ne’e nunka rekupera.

“Durante maizumenus loron 12 ne’ebé nia pasa iha kuidadu intensivu, saudozu Francisco Guterres Lú-Olo la rekupera no ikus mai hakotu iis iha kalan 21 Juñu,” Alito Soares hateten.

Sirurjiaun ne’e deklara katak nia simu ona autorizasaun espresa hosi feto-faluk atu fó sai informasaun ne’e ba públiku.

“Hanesan médiku ne’ebé atende Sauduzu Lú-Olo, ha’u konsidera ha’u-nia an besik ba família hanesan maun ki’ik ida no ha’u hakarak fó informasaun jerál enkuantu mantein konfidensialidade hosi saudozu Francisco Guterres Lú-Olo no nia família tomak,”.

Kona-ba kauza mate, Dr. Alito sita étika médiku no devér konfidensialidade, hodi husu atu asuntu ne’e labele fó sai ba públiku.

“Ha’u husu komprensaun hosi ema hotu hodi nune’e asuntu ne’e hetan tratamentu ho respeitu, hodi hanoin sirkunstánsia triste sira ne’ebé ita hasoru daudaun. Ha’u husu mós atu tema ne’e labele espozitu ba konsumu públiku liu fali saida maka apropriadu,” nia deklara.

Reprezentante Ministériu Saúde ne’ebé marka prezensa iha konferénsia ne’e klarifika liután katak eventu ne’e koordena tiha ona antesipadu ho família no faluk, ne’ebé autoriza ho kondisaun atu ko’alia de’it asuntu jerál sira, sein profunda iha detallu tratamentu klíniku nian.

Iha konferénsia imprensa ne’e, Embaixadór Timor-Leste nian iha Malázia, Lisualdo Gaspar, fó sai katak Embaixada akompaña ona eis-PR Lú-Olo ba konsulta sira antes evakuasaun fulan-Maiu nian, hodi fornese apoiu no asisténsia másimu ne’ebé posivel durante nia estadia iha Kuala Lumpur.

Bainhira to’o notísia katak eis-PR Lú-Olo sei halo viajen iha voo espesiál iha loron 23 fulan-Maiu, Embaixada prepara atu simu nia iha aeroportu, maibé ospitál la espesifika aeroportu rua Kuala Lumpur nian ne’ebé maka sei uza.

Embaixadór esplika hodi hatutan katak ospitál rekomenda ona atu resepsaun ne’e hala’o diretamente iha instalasaun ospitál nian.

“Iha ha’u nia kapasidade nu’udar Embaixadór, ha’u ba ospitál hodi hein Sua Exelénsia no simu nia pesoalmente bainhira nia to’o iha kalan loron 23 nian,” afirma embaixadór Lisualdo Gaspar.

Hafoin operasaun iha loron 09 fulan-Juñu, embaixadór ne’e rasik vizita eis-PR Lú-Olo iha loron 10 no  loron 12 fulan-Juñu.

Diplomata ne’e mós deskreve knaar Embaixada nian hafoin lider nasionál ne’e husik iis, halo koordenasaun ho família, halo ligasaun ho autoridade Malázia no Ministériu Saúde Malázia nian kona-bá repatriasaun mate-isin sira, no kontaktu ho kompañia aérea Aero Dili no Ministériu Komunikasaun no Transporte Malázia nian hodi asegura autorizasaun ba voo espesiál repatriasaun nian.

Embaixadór ne’e rasik akompaña eis-PR Lú-Olo nia restus mortais to’o iha Dili iha loron 22 fulan Juñu.

Diplomata ne’e aborda mós pergunta sira kona-ba auzénsia hosi bandeira nasionál ne’ebé taka kaixaun bainhira to’o iha Díli.

Embaixadór ne’e klarifika katak transporte internasionál ba restus mortais sira implika prosedimentu espesífiku sira ne’ebé maka mandatu hosi Ministériu Saúde Malázia nian, inklui inspesaun, taka metin, no taka kaixaun ho plástiku.

“Saida maka públiku haré maka loloos katak kaixaun to’o taka metin no taka ona ho plástiku. Tanba ne’e maka, bainhira sai hosi Malázia, la taka ho bandeira ida, maibé taka ho plástiku ne’ebé maka ema barak haré iha aeroportu. Ne’e hanesan ezijénsia ida ba transporte internasionál hosi restus mortais umanu sira,” nia esplika, hodi hatutan katak hafoin to’o iha Díli, kaixaun ne’e organiza hosi komisaun organizadór sira.

Embaixadór ne’e konklui nia intervensaun ho omenajen ba eis-Prezidente Repúblika Francisco Guterres Lú-Olo.

“Iha loron hirak liubá hatudu momoos katak Timor-Leste lakon oan-mane ida, aman ida, eroi veteranu ida, no líder di’ak ida, líder haraik-an ida ne’ebé hadomi nia povu. Omenajen barak ne’ebé fó ba nia, liuliu hosi ema baibain, haraik-an, hatudu momoos oinsá ita hotu sente kle’an tebes lakon Sua Exelénsia Francisco Guterres Lú-Olo,” Embaixadór Lisualdo Gaspar afirma.

Jornalista: Davilio Valdemir/Editór: Vito Salvadór