Ministériu Justisa Prepara Emisaun Parsela 30.000 Ba Direitu Propriedade iha 2027 To’o 2031

Ministru Justisa Sérgio de Jesus Fernandes da Costa Hornai .

Díli, 17 Agostu 2026 (RAFA) — Ministériu Justisa (MJ) prepara emisaun parsela hamutuk 30.000 ba direitu sertifikasaun no prioridade iha tinan 2027 to’o 2031.

Ministru Justisa, Sérgio de Jesus Fernandes da Costa Hornai,  Segunda-ne’e ba jornalista sira hateten iha reuniaun Komisaun Revizaun Orsamentu  Polítika (KROP) 2027 nian,  Ministériu,  Justisa aprezenta área temátika importante sira, liuliu kona-bá direitu propriedade no kresimentu ekonómiku.

Nia esplika, Ministériu Justisa diskute oinsá atu halo levantamentu komprensivu kona-bá jestaun rai no propriedade, ho objetivu atu garante asesu no atribuisaun direitu titularidade ba sidadaun sira.

“Pelumenus ita iha ona meta ka objetivu balun ne’ebé ita hakarak alkansa, hanesan parsela sira  30.000 sertifikadu direitu propriedade ne’ebé ita hakarak atribui ba ita nia sidadaun sira  iha tinan 2027  to’o tinan 2031,”  Ministru Justisa Sérgio de Jesus Fernandes da Costa Hornai informa.

Governante ne’e hatutan Ministériu Justisa sei haforsa dezenvolvimentu institusionál no kapasidade rekursu umanu, liuliu iha área levantamentu no servisu sira iha Diresaun Terras no Propriedade, husi nível nasionál to’o munisípiu.

Ho situasaun ne’ebé eziste agora, Ministériu Justisa foin konsege halo emisaun títulu direitu propriedade ba brsela sira 578 no Ministériu Justisa iha ona ninia programa prioridade no sub-programa sira, liuliu oinsá atu prosede atividade jestaun terras no propriedade.

Governu sei halo rekonesimentu ba situasaun propriedade sira, inklui direitu privadu partikular, direitu públiku Estadu no direitu privadu Estadu, hodi garante seguransa jurídika bá sidadaun sira.

Ministru Sérgio Hornai konsidera prosesu ne’e la’ós servisu fasil, tanba problema direitu propriedade iha Timor-Leste iha istória no kompleksidade ne’ebé naruk, hahú husi períodu kolonial portugés, okupasaun Indonézia no to’o períodu independénsia.

Nia subliña, dokumentasaun no seguransa jurídika kona-bá  propriedade bele fó benefísiu direta ba sidadaun sira, inklui asesu ba kreditu iha banku,  bainhira sidadaun sira iha titularidade propriedade ne’ebé klaru no iha seguransa jurídika.

Jornalista: Marcelino Tomae