Ministériu Justisa Esforsu Hela Haré Problema Blanku Ba BI

Ministru Justisa, Sérgio de Jesus Fernandes da Costa Hornai.

Díli, 13 Agostu 2025 (RAFA)—Ministériu Justisa (MJ) liuhosi Diresaun Jerál Servisu Rejistu Notariadu halo  esforsu hela haré ba problema blanku  ba Billete Identidade (BI) ne’ebé  dezde tinan 2023 utiliza  provizóriu de’it ho suratahan.

Ministru Justisa,  Sérgio de Jesus Fernandes da Costa Hornai, konfirma katak situasaun ida-ne’e Ministériu Jusitsa liuhosi Diresaun Jerál Servisu Rejistu Notariadu, buka hela atu haree númeru totalidade husi  sidadaun sira ne’ebé halo ona emisaun ba iha BI ne’e no sei iha rekapitulasaun hotu kedas hodi hahú mós halo akizasaun fazeadamente atu halo subsitituisaun bá fargun ne’ebé  Estadu rekiza atu halo substituisaun.

Ministru Sérgio de Jesus Fernandes da Costa Hornai, hateten BI provizoriu suratahan mutin  rejitu  ona iha baze  dadus Diresaun Jerál Servisu Rejistu Notriadu nian.

“Ita boot sira hatene katak  se nia baze  dadus konsulidadu iha sistema apenas emisaun iha de’it suratahan mutin, balu iha dadauk iha emisaun fargon ne’ebé ita utiliza ba iha ita nia sidadaun sira,” nia hateten.

Membru Governu ne’e dehan, iha tinan ida-ne’e akizasaun  halo tiha ona, servisu hamutuk ho Ministériu Administrasaun Estatál atu haré situasaun sira ne’e tantu  iha balkaun únika  no mós Servisu Rejistu Notariádu ne’ebé  Governu estabelese iha munisípiu sira   hodi halo nafatin atendimentu.

Nia fomenta tan katak tinan ida-ne’e Governu liu-husi Ministériu Justisa tau prioridade importante bá iha servisu emisaun bá iha dokumentu ofisiál sira,  husi Diresaun Jerál Rejistu Notariadu.

“Ita-boot sira nia pergunta,  ita -boot sira nia kestaun sira ne’ebé maka  ita-boot sira koloka pertinente, komunidade sira buka kontribui para atu bele iha duni dokumentu ida ne’ebé exelente no ofisiál  iha siguransa jurídika, ne’e loos, ami buka  haré ida-ne’e para atu bele hadia di’ak liután  iha tinan sira ne’ebé mai,” Ministru Justisa Sérgio de Jesus Fernandes da Costa Hornai hateten hodi responde RAFA, Kinta-ne’e, iha Díli.

Nia haktuir mos katak tinan barak ona Governu halo servisu ida-ne’e, maibé tenke haré bá orsamentu propriu ne’ebé  prevee bá Ministériu Jusitisa iha área hotu-hotu.

“Mais iha tinan 2027 mai, ha’u hanoin katak, ita nia estima orsamentu tinan ne’e mai ita haré dadauk hela, nune’e mó bá iha prioridade Programa  Governu nian, ita indentifika sai hanesan  prioridade sira ne’ebé seidauk hetan integrasaun iha  orsamentu estimativa future nian,”  Ministru Justisa afirma.

Orsamentu estimativa 2027 Ministériu Jusitisa sei introdus tan hodi halo kompleta  ba problema blanku  ba BI ne’ebé  dadaun ne’e sai preokupasaun husi sidadaun hotu iha teritóriu Timor laran tomak.

Governante fundamenta, la’ós tanba Ministériu laiha kapasidade atu rezolve problema ne’e, Governu buka esforsu tuir kapasidade orsamentu ne’ebé  kada tinan atribui bá Ministériu Justisa.

Ministeriu Justisa ho sériu atu fó orientasaun bá diresaun responsavél sira, atu halo planeamentu ida-ne’ebé komprensivu  prioridade no iha relasionamentu ba iha  servisu diresaun ida-idak ninia.

Dezde tinan 2023, sidadaun sira utiliza dokumentu ofisiál hanesan BI provizoriu , maibé rejistadu ona iha sistema  emisaun nian no demografia sistema manejementu, halo  rekapitulasaun bá dadus hotu-hotu ne’ebé tama ona iha sistema laran.

Jornalista: Marcelino Tomae