Ministériu Interiór Laiha Ona Buat Ruma ho Prosesu Rekrutamentu PNTL Foun

Ministru Interiór, Francisco da Costa Guterres. Imajen/Rafa.tl

Díli, 26 Agostu 2026 (RAFA)- Ministru Interiór (MI) Francisco da Costa Guterres, informa sira-nia parte husi Ministériu Interiór laiha ona buat ruma ho prosesu rekrutamentu kadete Polísia Nasionál Timor-Leste (PNTL) foun tanba servisu sira-ne’e kompeténsia iha Komandu Jerál PNTL ho Ekipa Juri Rekrutamentu nian.

“Ita boot sira bá Polísia de’it, iha ona Polísia ne’ebá sira hala’o ona, sei hare dokumentu hamutuk 12 mill resin, sira halo revizaun kuandu hotu ona ne’e tama ona prosesu faze tuir mai , ne’ebé husu buat ruma bá iha komisaun juri ne’ebá,” Ministru Interiór Francisco da Costa Guterres, hateten hodi responde joranlista sira iha Palásiu Governu, Kuarta-ne´e.

Nia afirma  Ministériu Interiór laiha ona buat ruma,  tanba Ministériu só simu relatoriu husi Polísia no komisaun juri ba  rekrutamentu kadete foun PNTL.

Ministru Interiór Francisco da Costa Guterres hateten, preparasaun parte governu halo hotu ona, nune’e husu ba  komisaun juri, tanba sira mak halo hela servisu.

Ministru Interiór subliña, prosesu rekrutamentu kadete foun PNTL lori tempu naruk tanba kadete balun nia idade ne’ebé mak mudansa ho ida-ne’e mak  agora dadaun komisaun hala’o hela revizaun depois mak fó sai naran.

Iha loron 05 fulan-Agostu, Segundu Komandante Jerál PNTL, Komisária Asistente Polísia, Natercia Eufasia Soares Martins, konfirma katak Polísia Nasional Timor-Leste (PNTL) simu ona despaixu ofisiál husi Ministériu Interiór atu hahú preparativu ba realizasaun re-teste ba kandidatu foun PNTL hamutuk na’in-12.996, ne’ebé antes ne’e tuir ona prosesu selesaun ba rekrutamentu.

“Problema ne’ebé akontese mak atrazu hodi hetan despaixu husi Ministériu Interiór. Depois de despaixu ne’e mai, ami bele forma estrutura ka komisaun atu hala’o servisu. Despaixu ne’e tun ona no ekipa komisaun mós forma ona. Agora daudaun dezenvolve  hela etapa sira atu prepara prosesu re-teste,” Natercia Eufasia Soares Martins informa.

Nia esplika katak despaixu refere fó autorizasaun ba PNTL atu organiza no hala’o fila-fali prosesu avaliasaun ho transparénsia, imparsiálidade no profesionalizmu, tuir orientasaun Governu no lejislasaun ne’ebé vigora.

Tuir informasaun husi PNTL, komisaun organizadora sei prepara etapa hotu-hotu ba re-teste, inklui verifikasaun dokumentu, ezame saúde, teste aptidaun fízika, teste eskrita no entrevista. Data ofisiál ba realizasaun re-teste sei anuncia iha tempu badak liuhusi kanal ofisiál PNTL.

Jornalista: Juvinal Cabral dos Santos