Ministériu Edukasaun Sei Integra Siénsia AI iha Kurikulu Eskolar

Ministra Edukasaun Dulce de Jesus.

Díli, 24 Agostu 2026 (RAFA) —  Ministra Edukasaun, Dulce de Jesus konfirma katak tempu badak sei intrega siénsia  Intelijénsia Artifisiál (AI) iha kurikulu eskolar iha futuru.

Ministra Dulce de Jesus hateten Ministériu Edukasaun ba oin tau importansia atu iha polítika ne’ebé bele haforsa komprensaun estudante no profesór sira kona-bá utilizasaun AI, inklui aspetu seguransa no responsabilidade iha nia utilizasaun.

“Agora ita iha era dijitalizasaun, ita mós halo formasaun ba profesór sira, inklui inspetór sira mós uza ona teknolojia hodi observa sala de aula, no mentor sira mós uza,”  Ministra Dulce de Jesus, informa ba jornalista sira iha ámbitu SCI-Tech Expo 2026 iha Sentru Konvensaun Díli (CCD),  Segunda-ne’e.

Governante ne’e mós informa katak Ministériu Edukasaun servisu hamutuk ho Ministériu Transportes no Komunikasaun atu instala servisu teknolojia iha eskola 60 no ba orsamentu tinan 2027, Ministériu Edukasaun sei kontinua fasilita eskola sira atu dezenvolve siénsia no teknolojia iha Timor-Leste.

Ministra Dulce de Jesus haktuir SCI-Tech Expo 2026 no Simeira Siénsia no Dezenvolvimentu 2026 fó oportunidade ba estudante sira atu aumenta koñesimentu iha área siénsia, teknolojia no matemátika.

Iha oportunidade hanesan, estudante Universidade Nasionál Timor Lorosa’e (UNTL), Angelino Pereira, hato’o apresiasaun tanba hetan oportunidade atu partisipa iha aprezentasaun kona-ba dezenvolvimentu teknolojia, liuliu Inteligénsia Artifisiál, ne’ebé nia konsidera hanesan mudansa importante iha era dijitál.

Angelino esplika teknolojia ohin loron dezenvolve ho lalais no kontinua lori ferramenta foun oioin ne’ebé bele ajuda ema dezenvolve kapasidade, habilidade no koñesimentu.

Aliende ne’e,  teknolojia bele sai meiu ida atu ajuda estudante no komunidade dezenvolve an, liuliu iha área koñesimentu no kapasidade. Maibé, nia alerta kona ba utilizasaun teknolojia tenke ho responsabilidade no la bele halo ema sai depende liu ba teknolojia.

“Teknolojia tenke sai hanesan dalan ida atu fasilita ita dezenvolve liután ita-nia kapasidade no koñesimentu. Ita labele depende liu ba teknolojia, maibé tenke koko no uza nafatin ita-nia koñesimentu rasik,” Angelino relata.

Reprezentante estudante UNTL ne’e dehan  SCI-Tech Expo 2026 sai oportunidade importante ba estudante sira atu halo peskiza, hametin koñesimentu siéntífiku no dezenvolve kultura siénsia iha Timor-Leste.

Jornalista: Remigia Locatelli