Milena Pires Re-anúnsia Kandidatura Independente Ba Eleisaun Prezidente Repúblika Períodu 2027-2032

Milena Pires.

Díli, 14 Novembru 2026 (RAFA) —Milena Pires,  feto Timor-oan intelektuál ida, Sábadu-ne’e,  ofisialmente re-anúnsia nia kandidatura nu’udar kandidata independente ba eleisaun  Prezidente Repúblika períodu 2027-2032.

Deklarasaun ofisiál ne’ebé hala’o iha Muzeu Rezisténsia Timorense (AMRT), Díli,  Milena Pires afirma katak desizaun atu rekandidata-an ne’e bazeia ba preokupasaun kle’an hasoru problema sosiál oioin iha rai-laran, liuliu asuntu ne’ebé afeta feto sira iha teritóriu nasionál, ne’ebé nia konsidera Estadu no Governu seidauk liberta ho másimu.

“Husi feto sira iha munisípiu oioin, ha’u rona informasaun ne’ebé halo ha’u preokupa tebes kona-bá violénsia hasoru feto no labarik-feto, inklui asédiu seksuál iha servisu-fatin,” Milena Pires hateten iha nia intevensaun.

Nia hatutan, situasaun ida-ne’e kontinua hametin kultura silénsiu no halo vítima sira ta’uk atu denunsia abuzu tanba tauk retaliasaun.

Nia salienta katak feto sira kontinua hasoru violénsia doméstika, seidauk hetan oportunidade ne’ebé balansu, no sei moris iha sistema sosiedade patriarkál nia okos.

Nia mós nota katak feto sira iha setór agrikultura no ekonomia sei hasoru bareira forte atu asesu ba fini kualidade no rekursu seluk.

Milena Pires mós kestiona espasu ba juventude sira ne’ebé tuir nia observasaun, dala barak polítiku sira uza de’it iha palku polítiku maibé menus iha asaun konkreta.

Milena hateten hafoin halo vizita no avaliasaun iha munisípiu hotu, inklui Rejiaun Administrativu Espesiál Oé-Cusse Ambeno (RAEOA), nia sente prontu atu lori povu no feto sira-nia lian.

“Ha’u sei formaliza ha’u-nia kandidatura independente ba Prezidente Repúblika mandatu 2027-2032 bainhira Prezidente Repúblika dekreta ona data eleisaun,” Milena Pires afirma.

Tuir nia, katak pasu ida-ne’e la’ós atu buka podér ka privileziu, maibé ho vontade tomak atu kontinua serbí povu ho umildade, integridade, kompaixaun, no empatia, liu husi lema “Hamutuk ba Futuru, Integridade no Serbí Unidade”.

Karreira Profisionál

Milena Pires moris iha Díli, iha loron 19 fulan-Juñu tinan 1966. Iha tinan 1975, bainhira halo tinan sia, nia ho nia família tenke bá ezíliu iha Austrália tanba okupasaun Indonézia.

Iha ne’ebá, nia hahú envolve-an iha Konsellu Timoroan-Australianu (TAC) hodi ajuda refujiadu sira, no fó konsellamentu ba vítima trauma liuhusi STARTTS.

Iha tinan 1989, Milena Pires envolve iha frente diplomátika hodi defende direitu autodeterminasaun Timor-Leste nian iha fórum internasionál sira, inklui Komité Deskolonizasaun ONU (Komité 24) no Konferénsia Mundiál kona-ba Feto iha Beijing.

Hafoin independénsia, Milena Pires asume kargu importante oioin, hanesan:

2001-2002, Membru Asembleia Konstituente hodi hakerek Konstituisaun RDTL no kontinua serbí iha Parlamentu Nasionál dahuluk.

2002-2007, Xefe ba Fundu Dezenvolvimentu ONU nian ba Feto (UNIFEM) iha Timor-Leste.

2010-2014, Membru iha Komité ONU nian ba Eliminasaun Diskriminasaun Kontra Feto (CEDAW).

2016-2020, Embaixadora no Reprezentante Permanente Timor-Leste nian iha Organizasaun Nasoins Unidas (ONU), Nova Iorke.

Iha setór privadu no sosiál, Milena Pires mós nu’udar CEO ba East Timor Trading Group, membru fundadór TLHDO, konselleira ba Universidade Katólika Timorense (UCT), no membru konsellu ArtEmpreender.

Jornalista : Remigia Locatelli