MI Hahú Rezolve Saláriu Estraordináriu Funsionáriu DNSPP

Ministru Interiór (MI), Francisco da Costa Guterres. Imajen/Rafa.tl

DILI, RAFA.tl- Ministru Interiór (MI), Francisco da Costa Guterres hatete, Ministériu Interiór hahú  rezolve ona saláriu estraordináriu (saláriu décimo terceiro ho osan alimentasaun) ba funsionáriu Diresaun Nasionál Proteje Patrimóniu Públiku (DNSPP) ne’ebé antes ne’e hetan problema.

Notísia relevante: Saláriu Décimo Terceiro La Kompletu, Funsionáriu DNSPP Halo Protesta iha Ministériu Interiór

Ministru Interiór (MI), Francisco da Costa Guterres, ba jornalista sira iha Palásiu Governu, Díli, Kuarta (14/01/2026) hatete, saláriu estraordináriu funsionáriu DNSPP hahú tiha ona, espera katak remata tan sira nia saláriu sira sei hetan tan désimu terseiru, ne’e sira direitu sei labele lakon, se halakon ema nia direitu ne’e sala boot.

“Ministériu Interiór iha osan atu halo pagamentu ba saláriu désimo terceiro no estraordináriu ba DNSPP nian,” Ministru Interiór Francisco da Costa Guterres hateten.

Governante ne’e hatutan, ho orsamentu ne’ebé ministériu iha, hasai uluk saláriu décimo terceiro, rezolve uluk depois halo ánalize ba orsamentu ne’e, se kazu la to’o ba depois haré fali, no halo fali jestaun interna para depois kobre fali saláriu ida ikus.

Ministru Francisco da Costa Guterres hatete, seidauk bele ko’alia pagamentu estraordináriu ba funsionáriu DNSPP fó iha verba ida ne’ebé, tanba kestaun tékniku labele ko’alia, maibé hanesan Ministru fó orden ona ba tékniku sira atu halo pagamentu.

“Ha’u seidauk bele ko’alia hasai husi verba ida ne’ebé, tanba tékniku ne’ebé ha’u seidauk bele ko’alia ne’ebé ha’u ladún hatene, ne’e tékniku sira-nian, mas ha’u fó orden ba sira ne’e tenke selu. Pagamentu ne’e husi orsamentu jerál estadu 2026 nian,” Nia argumenta.

Ministru Interiór, Francisco da Costa Guterres subliña, kona-bá pagamentu ne’e la fó implikasaun ba pagamentu estraordináriu sira ne’ebé sei halo iha fulan ikus tinan 2026.

Antes ne’e, Konsellu Ministru liu husi Reuniaun estraordináriu iha Palásiu Governu, Dili, Segunda (11/01/2026), analiza dadus ne’ebé Ministériu Finansas aprezenta kona-bá prosesu regularizasaun ba pagamentu saláriu décimo terceiro tinan 2025 nian no deside hasai orsamentu hamutuk millaun US$4.5 hodi halo pagamentu ba funsionáriu públiku no ajente administrasaun sira ne’ebé seidauk simu sira nia direitu estraordináriu no saláriu décimo terceiro.

Reportajen ekipa Rafa.tl