MESSK Husu Investiga Pessoál Estajiáriu Ne’ebé Vasina Bebé To’o Lakon Vida

Ministru Ensinu Superiór Siénsia no Kultura (MESCC, sigla portugés), José Honório da Costa Pereira Jerónimo. Imajen/Rafa.tl

DILI, RAFA.tl– Ministru Ensinu Superiór Siénsia no Kultura (MESSK), José Honório da Costa Pereira Jerónimo, husu ba parte kompetente atu halo investigasaun kle’an kona-bá kazu bebé ida lakon vida iha Sentru Saúde Munisípiu Liquiça hafoin hetan vasinasaun husi pessoál estajiáriu sira, finalista Universidade Nasionál Timor Lorosa’e (UNTL).

Notísia Relevante: Opozisaun Preokupa ho Kazu Mal-Prátika iha Sentru Saúde Liquiça no Husu Hakle’an Investigasaun

Iha Kinta, 30 fulan-Outubru 2025, mosu akontesimentu ida ne’ebé virál iha mídia sosiál, relasiona ho inan ida ne’ebé lori nia oan ho idade fulan ida semana-rua, ba simu vasina iha sentru saúde, estajiadu mak fó vasina, no liu de’it loron ida, bebé ne’e lakon vida, deskonfia kauza husi vasina ne’ebé nia simu.

Ministru Ensinu Superiór Siénsia no Kultura (MESSK), José Honório da Costa Pereira Jerónimo, ba jornalista sira iha resintu Parlamentu Nasionál, Kuarta (05/11/2025) hateten, hanesan ministru husu halo investigasaun ba ema ne’ebé mak atende bebé  ikus mai lakon vida no husu atu públiku labele rasionaliza situasaun ida hodi hateten katak fakuldade medisina ninia estudante sira laiha kualidade.

“Hanesan Ministru husu atu halo investigasaun ba ema sesé mak atende ba bebé ne’e ikus mai hakotu nia iis, ida-ne’e mak importante, maibé estudante sira ne’e mak halo prátika, ha’u hanoin sira iha preparasaun mós di’ak, ne’ebé ita labele rasionaliza situasaun ida hodi hateten katak, fakuldade medisina UNTL nia estudante sira laiha kualidade, ida ne’e la’ós razaun fundamental,” Ministru José Honório da Costa Pereira Jerónimo hateten.

Nia  haktuir, nu’udar Ministru husu ba instituisaun kompetente halo investigasaun kle’an ba kazu ne’e hodi alerta ba públiku katak, kazu ne’e mai hanesan ne’e.

Nia rekoñese los duni prátika ne’e, estudante estájiu sira rasik, maibé labele ko’alia kualidade ensinu superiór laiha, hanesan ministru triste los. Ne’ebé hanesan Ministru husu atu halo investigasaun kle’an ba kazu ne’e hodi hatene autór importante ba mal prátika ne’e sé.

“Ha’u hanoin, situasaun ida ne’e ita labele rasionaliza katak kursu sira ne’ebé estudante sira foti ne’e ladi’ak, tanba kazu ida ne’e ita labele rasionaliza situasaun hotu. Atu hateten katak, ha’u mós akompaña kazu ne’e, mais ita hein investigasaun ne’ebé la’o hodi hateten katak, ne’e mal prátika ka buat seluk,” nia tenik.

Governante ne’e subliña liután katak, labele heteten kedas bebé ida mate pois  rasionaliza katak ensinu superiór sira iha Timor-Leste laiha kualidade, labele hanoin nune’e, tanba estudante sira ne’e aprende no hatene hodi ba halo prátika, maibé karik mosu buat balun ne’ebé públiku ka ema labele espera hanoin ida ne’e  mós bele akontese.

Reportajen ekipa Rafa.tl