MESSC Sei Nomeia Fiskál Úniku Troka Diresaun Inspesaun Auditória no Kontrolu Kualidade UNTL

Ministru Ensinu Superiór Siénsia no Kultura (MESSC, sigla portugés), José Honório da Costa Pereira Jerónimo. Imajen/Rafa.tl

DILI, RAFA.tl- Ministru Ensinu Superiór Siénsia no Kultura (MESSC, sigla portugés), José Honório da Costa Pereira Jerónimo hateten, ministériu sei nomeia fiskál úniku tuir estatutu foun Universidade Nasionál Timor Lorosa’e (UNTL) hodi troka Diresaun Inspesaun Auditoria no Kontrolu Kualidade ne’ebé Reitór João Soares Martins absolve ona.

Notísia Relevante: Diresaun Inspesaun Jerál no Auditoria UNTL Keixa Reitór João Soares Martins Ba PNTL

Ministru Ensinu Superiór Siénsia no Kultura (MESSC, sigla portugés) José Honório da Costa Pereira Jerónimo haktuir, iha estatutu foun UNTL nian ne’ebé hetan ona aprovasaun husi Prezidente Repúblika, José Ramos-Horta, hateten ho momos katak, laiha ona Diresaun Inspesaun Auditoria no kKntrolu Kualidade iha UNTL, no Ministériu mak sei nomeia fiskál úniku hodi troka, tanba ne’e iha razaun Reitór João Soares Martins suspende ka halakon diresaun ne’e iha UNTL.

“Estatutu UNTL foun ne’e, Prezidente Repúblika promulga tiha ona iha ne’ebá, UNTL laiha ona pro- reitór ba asuntu Auditoria no Inspesaun, maibé sira iha de’it fiskál úniku ne’ebé Ministériu mak sei nomeia ema ida haré asuntu ne’e. Tanba ne’e , Reitór uza ninia kompeténsia tomak hodi hapara tiha pro-reitór no ajusta tiha hamutuk ho diresaun sira seluk,” Ministru  José Honório da Costa Pereira Jerónimo, klarifika ba jornalista sira bainhira partisipa debate OJE 2026 iha Parlamentu Nasionál, Segunda (17/11/2025).

José Honório subliña, ema hotu tenke hatene katak kargu ne’e ema hotu nian, kargu labele tau iha fuan, maibé tau iha bolsu, bainhira ema ne’ebé nomeia hakarak nomeia fali ema seluk, tenke simu.

Nia hatutan, bainhira hetan informasaun katak pro-reitór ho nia ekipa keixa Reitór João Soares Martins ba Polísia Investigasaun Kriminál Nasionál, komunika kedas ba Komisáriu Funsaun Públika hodi hatene.

“Ha’u kontaktu kedas Komisáriu Funsaun Públika kona-bá pro-reitór Rosalino ne’ebé ba keixa Reitór ba PNTL, lolós ne’e nia labele ba PNTL, se nia la kontente nia tenke ba Komisaun Funsaun Públika hanesan funsionáriu públiku,” nia dehan tenik.

Ministru MESSC afirma, Reitór João Soares Martins nia despaixu taka Diresaun Inspesaun Auditoria Kontrolu Kualidade tanba tuir estatutu foun UNTL nian.

“Reitór Kontaktu kedas ha’u, ami rua ko’alia, ha’u hatete ba nia, ita bo’ot iha kompeténsia tomak, mais favór boot ida hatete ba sira, Diresaun Auditoria atu lee, estatutu foun, ne’ebé governu aprova tiha ona. Prezidente promulga tiha ona, kona-ba estatutu UNTL nian iha ne’ebá, laiha ona Diresaun Auditoria, iha mak fiskál únika ne’ebé Ministru tutela, ne’ebé Ministru mak sei nomeia ema independente ida, atu halo servisu ne’e. Ne’ebé sei buka hela.” Nia argumenta.

MESSC lamenta ho pro-reitór ho nia ekipa ne’ebé alega atuál Reitór UNTL, João Soares Martins, halo abuzu podér hodi taka Diresaun Inspesaun Auditoria Kontrolu Kualidade universidade nian, tanba buat hotu tuir estatutu foun UNTL.

Reportajen ekipa Rafa.tl