Mensajen Premiadu Nobel Ba Paz Kailash Satyarthi Inspira Estudante UCT Ba Hasoru Dezafiu no Rezolve Konflitu

Laureadu Prémiu Nobel da Paz, Kailash Satyarthi hato'o aprezentasaun iha Simeira ho tema “Social Protection and Community Programmes” iha ámbitu Simeira Siénsia ba Dezenvolvimentu 2026 ba estudante UCT sira iha Kampus UCT, Tersa 25 Agostu 2026.

Díli, 25 Agostu 2026 (RAFA)- Estudante Universidade Katólika Timorense (UCT) apresia mensajen husi Laureadu Prémiu Nobel da Paz, Kailash Satyarthi, ne’ebé hato’o iha Simeira ho tema “Social Protection and Community Programmes” ne’ebé inspira estudante sira atu hola pozisaun firme hasoru dezafiu no rezolve konflitu hodi proteje labarik.

Estudante husi fakuldade Direitu UCT, Julieta de Araújo dehan aprezentasaun husi Premiadu Nobel da Paz ne’e motiva tebes sira, liu-liu bainhira nia ko’alia kona-bá labarik sira ne’ebé sofre iha funu laran.

“Atividade ohin ne’ebé ita nia señór laureadu Kailash Satyarthi ne’ebé esplika kona-bá labarik sira ne’ebé iha sofrementu iha funu laran, maske sira mós hakarak mehi hanesan ita Timor-oan ne’ebé dadaun ami hala’o hela ami nia estudu,” Julieta de Araujo hateten hodi responde RAFA, Tersa-ne’e.

Nia hatutan, ho mensajen hudi laureadu ne’e enkorja nia atu oinsá sai husi konfuzaun, brani atu ko’alia, hasoru dezafiu sira no la’ós de’it atu haree dezafiu sira maibé koko tenta kolabora ho ema hodi bele rezolve konflitu.

Julieta ne’ebé estuda iha area Direitu iha Universidade Katólika Timorense dehan nia orgullu partisipa no la’ós atu rona de’it maibé mós atu aplika iha moris.

“Ami hanesan estudante direitu, ami la’ós atu rona de’it maibé ami mós hakarak aplika hodi reduz konflitu,” nia afirma.

Iha fatin hanesan, Ofisiál Relasaun Eksterna UCT, João Carlos dehan tema kona-bá protesaun sosiál no programa komunitária importante tebes ba estudante universitariu sira, tanba sira mak sei iha responsabilidade ba futuru.

“Ha’u hanoin tema ida ohin mak ho esplika ne’ebé ema esperiénsia boot, ema ne’ebé mak servisu tinan barak ba apoiu labarik sira husi krime, abuzu seksuál, husi funu no buat barak ne’ebé afeita bá labarik sira-nia mental no fízika,” hatete João Carlos.

Nia hatutan, liuhusi esperiénsia ne’ebé Nobel Laureadu fahe, estudante sira bele banati tuir no iha paixaun uja fuan ba fuan hodi ajuda labarik sira iha area rural sira ne’ebé moris iha situasaun defisíl hanesan abuzu seksuál no esplorasaun.

Simiera ida-ne’e fó hanoin bá parte akademiku, Governu para oinsá bele servisu hamutuk atu nune’e bele hasai labarik sira iha situasaun vulneravel nia laran.

RAFA nu’udar parseiru ofisiál mídia husi simeira ne’e no transmite diretamente sesaun hotu-hotu ho tradusaun ba Tetun, no mós halo kobertura notísia kona-ba eventu ne’e.

 Jornalista: Juvinal Cabral dos Santos