ME ho UN Woman Halao Parseria iha Formasaun Abilidade Bá Partisipasaun Ekonomia Feto iha TL

Ministériu Edukasaun (ME) halao parseria ho UN Women Timor-Leste, ne’ebé foka liubá projetu Formasaun Abilidade bá partisipasaun ekonómika feto iha Timor-Leste. Imajen/Rafa.tl

DILI, RAFA.tl–  Ministériu Edukasaun (ME) halao parseria ho UN Women Timor-Leste, liuhosi asina nota intendimentu (MoU), ne’ebé foka liubá projetu Formasaun Abilidade bá partisipasaun ekonomia feto iha Timor-Leste.

MoU ne’e formaliza parseria estratéjiku ida ne’ebé ho objetivu atu hakbi’it labarik-feto no feto-klosan marjinalizadu sira, iha Lautem no Oé-Cusse ho abilidade sira ne’ebé relevante bá merkadu iha empreendedorizmu, literasia dijitál no finanseira.

Projetu ne’e aproveita infraestrutura edukasaun nasionál ne’ebé eziste, espesífikamente Sentru Aprendizajen Komunitária (CLCs) no Edukasaun Téknika no Vokasionál (TV) no Treinamentu ba eskola sira foin-sa’e sira ne’ebé dalabarak esklui hosi dalan edukasaun formál no empregu nian.

Diretóra Jeral Planu Polítika Inkluzaun no Informatika, Odelia das Dores Ung Martins, ba jornalista sira iha salaun VIP Ministériu Edukasaun, Vila Verde, Kuarta (10/09/2025) hateten, nota indentimentu entre Ministériu Edukasaun ho Un Woman ida-ne’e, la’ós foin inisiu maibé instituisaun rua ne’e hanesan parseiru ida oinsá kontinua extende kooperasaun bá futuru.

Nia hatutan, liuhosi kooperasaun servisu hamutuk ne’e, atu haree oinsá responde bá deklarasaun ne’ebé maka hatur ona iha planu no programa ministériu nian, kona-bá atu hakbiit feto, hodi hasa’e sira-nia partisipasaun iha vida ekonomia.

“Ita halo ida ne’e atu responde ba deklarasaun Maubisse datoluk ne’ebé hatuur ona iha ne’ebá, oinsá atu bele haforsa ekonomia feto atu la depedensia diretamente bá se deit, maibé sira forsa atu hala’o sira-nia moris ho abilidade ne’ebé maka sira iha atu bele hahú ho servisu ki’ikuan ida ne’ebé bele fó rendimentu bá sira-nia moris,” Odelia das Dores Ung Martins hateten.

Diretóra ne’e afirma formasaun ida-ne’e prioridade liubá estudante hamutuk atus ida, husi feto 80 no mane  20, estudante sira ne’ebé maka atu partisipa iha programa ne’e maka sira ne’ebé dadaun ne’e tuir hela programa iha rekorente nia no mós sira ne’ebé maka iha Teknika Vokasional (TV).

Iha fatin hanesan Xefé Gabinete UN Woman Timor-Leste, Nishtha Satyam hateten, nota intendimentu ida-ne’e hanesan kompromisu ida liuhosi programa STEP atu transforma abilidade, konfiansa no oportunidade diretamente bá feto foin-sa’e marjinalijadu sira nia liman.

Xefé gabinete ne’e hatutan, programa ida-ne’e UN Woman maka servisu besik liu ho governu inklui Ministériu Edukasaun atu atinje UN Woman nia papel atu implementa programa ne’e ho diak.

“UN Woman nia programa prinsipál maka atu introduz programa  Formasaun Abilidade bá partisipasaun ekonómika feto, bá iha komunidade sira liuhosi Ministériu Edukasaun, no programa ne’e mós nia objetivu atu hasa’e kapasidade feto sira iha área rurál atu sira iha abilidade hodi sira bele tama áa iha industria sira hodi hasa’e sira-nia rendimentu iha sira-nia fatin,” Nishtha Satyam hateten.

Enkuantu nota entendimentu ne’e, ho nia durasaun fulan-18, maibé sei haree bá progresu karik iha rezultadu di’ak, maka sei kontinua implementa mós iha munisípiu sira seluk.

Programa ne’e rasik sei implementa iha fulan-Setembru nia laran, foka liubá feto sira ho idade 16 to’o 18  iha Munisípiu Lautém ho Rejiaun Administrativa Espesiál Oé-Cusse Ambeno (RAEOA).

Reportajen ekipa Rafa.tl