Noticias

ME ho KOICA Lansa Projetu Hadia Programa Merenda Eskolár ho Orsamentu Millaun US$7,2

todayNovember 18, 2026 36

Background
share close

Díli, 18 Novembru 2026  (RAFA) – Ministériu Edukasaun (ME) hamutuk ho Ajénsia Kooperasaun Internasionál Koreia (KOICA) no Programa Ai-han Mundiál (WHO) lansa projetu ho orsamentu millaun US$7,2 hadi’a programa nasionál merenda eskolár, hametin nutrisaun labarik sira no apoia produsaun agríkola lokál.

Ministra Edukasaun, Dulce de Jesus Soares, hatete katak merenda eskolár iha relasaun direta ho saúde no aprendizajen labarik sira-nian. Tanba ne’e presiza hadia jestaun merenda eskolár iha eskola sira.

“Projetu ne’e sei permite hadi’a koziña eskolár, kualidade hahán ne’ebé fornese ba estudante sira no edukasaun kona-ba nutrisaun,” hateten Ministra Dulce Soares hanesan sita husi komunikadu ofisiál ne’ebé RAFA asesu Kuarta-ne’e.

Iha parte seluk, Vise-Ministru Administrasaun Estatál, Jacinto Rigoberto Gomes de Deus, subliña nesesidade atu hametin koordenasaun entre instituisaun nasionál, Munisípiu no eskola sira, hodi hadi’a jestaun no monitorizasaun Programa Merenda Eskolár.

“Ida-ne’e atu hametin koordenasaun entre instituisaun nasionál, munisípiu no eskola sira hodi hadi’a jestaun merenda eskolár,” afirma Vise-Ministru ne’e.

Nia dehan, tranzisaun ba Faze II husi inisiativa vitál ida-ne’e mak atu habelar liután programa alimentasaun integradu iha kada uma-kain, fortifikasaun batar, no hadi’a infraestrutura eskola.

“Dezenvolvimentu nasionál loloos hahú iha ita-nia munisípiu sira, ita-nia postu administrativu sira, no ita-nia suku sira. Programa sira ne’e susesu bainhira polítika nasionál tradús ba asaun efetivu iha terrenu”, hatutan Jacinto Rigoberto.

Embaixadór Repúblika Koreia iha Timor-Leste, Chang Ha Yeon, reafirma apoiu husi nia nasaun ba inisiativa ne’e kobertura projetu ba Munisípiu Vikeke, ho objetivu atu benefisia labarik barak liután no apoia agrikultór lokál.

“Ida-ne’e bele apoiu agrikultor lokál sira no nia benefisiu mós ba labarik sira barak liután,” tenik Chang Ha Yeon.

Reprezentante Programa Ai-han Mundiál iha Timor-Leste, Jacqueline de Groot, relata katak projetu ne’e sei hametin kapasidade no mekanizmu nasionál sira iha jestaun Programa Merenda Eskolár, bazeia ba rezultadu husi inisiativa sira antes.

Projetu ne’e mós inklui atividade formasaun ba mestre, te’in-na’in no funsionáriu públiku sira, nune’e mós edukasaun kona-ba nutrisaun iha eskola sira, hodi promove hahalok alimentasaun saudavel no hametin sustentabilidade Programa Nasionál Merenda Eskolár.

Projetu ida-ne’e hanaran reforsa nutrisaun no seguransa ai-han iha Timor-Leste ne’e Repúblika Koreia liuhusi KOICA sei ezekuta durante períodu 2026 to’o 2030.

Projetu ne’e prevee atu fó benefísiu ba ema hamutuk 86.675, inklui estudante 85.049 husi eskola ensinu báziku 498, mestre, te’in-na’in no parseiru sira seluk hamutuk 1.156, nune’e mós agrikultór 470.

Objetivu prinsipál projetu ne’e atu hametin Programa Nasionál Merenda Eskolár, nu’udar programa Governu nian ne’ebé fornese hahán ba estudante sira iha ensinu báziku, hodi hadi’a sira-nia alimentasaun no nutrisaun, promove saúde no kria kondisaun di’ak ba prosesu aprendizajen no kontinuidade estudante sira iha eskola.

Programa ne’e mós buka atu promove utilizasaun produtu agríkola lokál ba preparasaun merenda eskolár, hodi apoia agrikultór sira no kontribui ba dezenvolvimentu ekonomia lokál.

Projetu ne’e kontinua rezultadu husi faze dahuluk inisiativa Say No to 5S (SN5S), ne’ebé hetan apoiu husi KOICA. Iha faze ida-ne’e, projetu aumenta kobertura ba Munisípiu Vikeke, ne’ebé integra hamutuk ho munisípiu Baukau, Bobonaru no Manufahi.

Atividade sira-ne’ebé projetu ne’e prevee inklui konstrusaun koziña foun 30 no fatin han iha eskola sira, fornese ekipamentu ku’sina, promove konsumasaun etu fortifikadu no hametin ligasaun entre eskola sira ho prodútór agríkola lokál.

Aleinde ne’e, projetu refere mós sei kria mekanizmu atu sosa produtu alimentár diretamente husi grupu agrikultór no kooperativa sira, hodi fasilita eskola sira asesu ba hahán fresku no oioin, nune’e mós kria oportunidade merkadu ba agrikultór ki’ik hamutuk 470.

Jornalista: Cesarina de Carvalho

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!