ME ho Embaixada UAE Hametin Kooperasaun Liuhosi Projetu Ne’ebé Promove Fraternidade Umana

Enkontru kortejia entre Ministra Edukasaun, Dulce de Jesus ho Adjunta Xefe Embaixada Emiradu Árabe Unidu iha Jakarta,  Shaima Salem, Segunda 17 Agostu 2026.

Díli, 17 Agostu 2026 (RAFA) —  Ministériu Edukasaun (ME) no Embaixada Emiradu Árabe Unidu (UAE) iha Jakarta, reafirma kompromisu hametin kooperasaun iha área edukasaun, liuhosi projetu sira ne’ebé promove prinsipiu fraternidade umana no oportunidade ba estudante sira husi nasaun rua.

Kompromisu ME ho UAE nian ne’e refleta iha enkontru kortejia entre Ministra Edukasaun, Dulce de Jesus ho Adjunta Xefe Embaixada Emiradu Árabe Unidu iha Jakarta,  Shaima Salem iha Díli, Segunda-ne’e.

Enkontru parte rua ne’e  diskute  mós kona-bá projetu edukativu ida ne’ebé envolve estudante sira husi Timor-Leste atu produz vídeo kona-bá ambiente no realidade iha Timor-Leste.

Projetu ne’e hetan apoiu husi Embaixada Emiradu Árabe Unidu no envolve kompetisaun vídeo, ne’ebé sei pasa liuhosi prosesu seleksaun no avaliasaun antes atribui prémiu ba vídeo sira ne’ebé konsidera di’ak liu.

“Primeiru vez ita hatama matéria fraternidade umana ba iha kuríkulu, no ida-ne’e servisu sei kontinua. Depois tempu oin mai, ita sei espresa tan saida mak Ministériu Edukasaun ho Emiradu Árabe atu halo kooperasaun iha futuru,” Ministra Edukasaun, Dulce de Jesus hateten.

Nia hatutan inisiativa ne’e sai parte ida husi esforsu Ministériu Edukasaun atu integra prinsipiu fraternidade umana iha kuríkulu no atividade edukasaun iha Timor-Leste.

Adjunta Xefe Misaun Embaixada Emiradu Árabe Unidu iha Jakarta, Shaima Salem AlHebsi, hato’o apresiasaun ba Governu Timor-Leste tanba bele serbisu hamutuk ho Árabe ba iha área edukasaun nia.

Nia kontente tebes tanba bele vizita Timor-Leste no hasoru Ministra Edukasaun ba primeira vez.

“Timor-Leste mak nasaun amigável ba ami, no ami aprésia apoiu ne’ebé Timor-Leste fó. Ami mai iha vizita amigável ida tan, no mós atu selebra projetu estudante sira nian ne’ebé ita servisu hamutuk,” Shaima Salem haktuir.

Nia iha esperensa atu iha kooperasaun no projetu bilaterál tan iha futuru, liuliu entre estudante sira husi Timor-Leste no Emiradu Árabe Unidu, inklui oportunidade ba estudante sira atu aprende no servisu hamutuk.

Reprezentante Embaixada Emiradu Árabe Unidu mós apresia apoiu Ministériu Edukasaun ba implementasaun prinsipiu fraternidade umana iha eskola sira iha Timor-Leste.

Nia konsidera inisiativa ne’e hanesan ezemplu ida ne’ebé hatudu vizaun komún entre nasaun rua atu promove prosperidade, toleránsia no komprensaun entre povu sira.

Parte rua mos diskute kona-ba faze implementasaun projetu iha tinan dahuluk no posibilidade atu kontinua no haburas kooperasaun iha futuru.

Kooperasaun ne’e sei fó atensaun ba oportunidade foun iha área edukasaun, inklui inisiativa sira ne’ebé bele hametin interasaun, aprendizajen no interkámbiu entre estudante sira husi Timor-Leste no Emiradu Árabe Unidu.

Jornalista: Cesarina de Carvalho