May Day 2026, KSTL Husu Labele Politiza Saláriu Mínimu $115 Ba $160

KSTL organiza marsa ho traballadór sira hodi selebra loron mundiál traballadór ka May Day, 01 Maiu 2026.

Díli 01 Maiu 2026 (RAFA.tl)- Klibur Sindikatu Timor-Leste (KSTL) kontinua ezize governu atu aplika saláriu mínimu ba traballadór sira husi $115 ba $160 kada fulan tuir deklarasaun ne’ebé maka asina tiha ona iha  nivel konselu nasionál traballu ho Governu liu husi  Sekretario Estadu Formasaun Profesional no Empregu (SEFOPE).

Prezidente KSTL, Almeiro Vila Nova, iha ámbitu komemorasaun loron mundiál traballadór ka may day, Sesta(01/05/2026) iha rezidénsia KSTL, hateten problema ne’ebé traballadór sira kontinua enfrenta iha nasaun ida ne’e maka saláriu mínimu nasionál, tanba Timor-Leste iha de’it modelu saláriu úniku tanba ne’e governu tenke tau atensaun no muda mekanizmu sira no lei sira atu garante sustentabilidade traballadór ho saláriu mínimu ne’ebé dignu.

Nia hatutan prosesu hotu-hotu konklui ona iha nivel konsellu nasionál traballu, no husu Ministériu Koordenador Asuntu Ekonomiku (MCAE)  atu labele politiza bebeik saláriu traballadór ne’ebé konsidera katak sei vulneravel hela.

“La iha razaun tan ba MCAE, ba Governu atu kontinua pendente ida ne’e, KSTL hanesan representante traballadór husu ba Governu labele politiza demais problema saláriu mínimu ne’e,” prezidente KSTL, Almeiro Vila Nova.

Saláriu mínimu ne’e sira konsidera katak, kontinua fó protesaun ba empregador sira no husi traballadór sira vulneravel liu, kontinua simu saláriu ho estandarizasaun $115 kada fulan.

KSTL ezize ida ne’e urujente liu-liu iha fulan-Maiu, tinan ne’e, urujente tenke presiza duni hasa’e saláriu mínimu traballadór sira nia husi $115 ba $160 kada fulan, liu husi deliberasaun ne’ebé maka asina ona iha Konsellu Nasionál Traballu.

KSTL mós kontinua otimismu ho pozisaun katak tinan ida ne’e tenke hasa’e saláriu traballadór no bainhira la iha mudansa maka KSTL sei kontinua halo mobilizasaun hasoru governu.

Iiha fatin hanesan representante traballadora,  Ofelia Libania hateten, loron 01 fulan-Maiu, kada tinan, sempre partispa iha atividade Konfederasaun Sendikatu Timor-Leste (KSTL) nian, hamutuk hodi ezize sira nia direitu liu-liu ba problema sira ne’ebé maka sira hasoru hanesan saláriu mínimu, no problema seluk ne’ebé sira hasoru iha servisu fatin.

‘’Ohin loron, ami kontinua ezize nafatin atu tau matan mai ami ne’ebé maka saláriu kiik, la’ós ba ema ida rua deit, maibé ema barak maka ezize tanba ne’e maka ohin loron ami nu’udar traballador ami lao tuir nafatin ho KSTL ezize ba governu,’’ Ofelia Libania hateten.

Traballadora ne’e mos kontinua husu ba traballadór domestika atu keta tauk hodi ko’alia sai violénsia ka asediu ruma ne’ebé sira hasoru iha servisu fatin.

Esperansa husi traballador sira iha ambitu komemorasaun 1 de Maio ne’e maka sira espera katak loron ida governu sei bele hasa’e salariu minimu $115 ba to’o $160 tuir akordu ne’ebé maka KSTL asina ona iha nivel  konsellu ba traballu.

Pontu importante ne’ebé sira hato’o iha komemorasaun ne’e maka, revizaun saláriu minimu, seguransa no saúde iha servisu fatin, protesaun ba traballadór informal, minimiza diskriminasaun ba feto no kbiit laek sira, Governu presiza kria empregu iha rai-laran , kria lei no ratifika konvensaun  organizaun Internasionál do Traballu (OIT ) maka hanesan revizaun ba lei númeru 4/2012, aselera lei ba traballadór, kria lei ba violénsia no asediu iha servisu fatin, Aselera dekretu lei ba salariu minimu no ratifika konvensaun 190 no konvensaun OIT númeru 144.

Iha ámbitu komemorasaun loron mundiál traballadór ne’e KSTL mós realiza atividade marsa  hahú husi Bé-Mori to’o iha Casa Europa nia oin no durante iha marsa ne’e KSTL no mós Polísia Nsionál Timor-Leste (PNTL) konsege hapara loja sira ne’ebé maka kontinua loke iha loron ida ne’e.

Jornalista: Remigia Locatelli/Editór: Vito Salvadór