Marsu no Maiu Tinan Ne’e, Aero Díli Lansa Vô Ba Malázia no Austrália

Na’in ba Aero Díli, Lourenço de Oliveira akompaña husi Diretora Jerál Aero Díli, Maria Angela Oliveira, halo konferénsia imprensa iha Otél Timor, Sesta (27/02/2026). Imajen/Rafa.tl

DILI, RAFA.tl – Empreza Aero Díli sei lansa nia vô dahuluk ba Kaula Lumpur-Malázia iha loron 28 fulan-Marsu no iha loron 24 fulan-Maiu, tinan ne’e, lansa mos vô dahuluk ba Darwin-Austrália, hodi haluan konetividade aero Timor-Leste ba nasaun seluk.

Na’in ba Aero Díli, Lourenço de Oliveira ne’ebé akompaña husi  Diretora Jerál Aero Díli, Maria Angela Oliveira,  liu husi konferénsia imprensa iha Otél Timor, Sesta (27/02/2026), informa  fulan-Marsu, tinan ne’e, Aero Díli  hahú semo ba Kuala Lumpur-Malázia semana ida dala rua, tuir lei aviasaun ne’ebé estabelese ona.

“Hahú iha loron 28 fulan-Marsu, ita semo ba Malázia  dala-rua iha loron Tersa ho Sábadu, portantu ita sai husi ne’e dadersan tuku 8.00 Otl, ita fila-fali tuku 12 Otl, husi Malázsia, ida-ne’e mak ita kompleta ita-nia vô hodi hatán fali sira semo mai ita mós bele semo ba tuir lei aviasaun nian,” Lourenço de Oliveira hateten.

Na’in ba Aero Díli haktuir, halo viajen ida ba iha fatin Ospitál Mahakota Medikal Senter iha Malaka, sira entuziazmu tebes atu simu pasiente sira husi  Timor-Leste, halo tratamentu saúde iha ne’ebá, ho ida ne’e, mak maluk Timor oan atu halo tratamentu ruma aviaun Aero Díli bele tula ka fasilita ba halo tratamentu iha ne’ebá.

Hafoin Aero Díli semo ba Malázia, sei semo mós  ba Darwin-Austrália iha loron 24 fulan-Maiu, tinan ne’e.

Lourenço de Oliveira esplika Austrália bele halo ona konetividade ho Futcou ho Futcame entaun halo hap iha ne’e hodi nune’e rai Timor komesa rame ona, ema husi nasaun seluk komesa mai  Timor no mós komesa servisu hamutuk ANATL hodi bele halo rame ona Aeroportu Internasionál Preizdente Nicolau Lobato no halo promosaun rai Timor ba nasaun seluk.

“Sei vô ba Darwin iha loron 24 fulan-Maiu ne’ebé loron 20 Maiu,  ita selebra loron restaurasaun independésia no ita semo ona ba Darwin, ita ba iha ne’ebá Tersa-feira sai husi ne’e tuku 12:00 Otl, tuku 04:00 Otl, fila-fali mai Timor-Leste. Pois Domingu dadér, ita semo ba, tuku 08:00  dadér  fila-fali mai tuku 9:45 dadeer, aviaun ne’e foti fali sira ne’ebé mak tranjit atu ba Denpasar-Bali bele aproveita ba sira hein iha ne’e oras ida de’it,” Lourenço hateten.

Emprezáriu Timoroan ne’e haktuir, aviaun rua ne’e, kada aviaun seidauk atinji ka halo vô ho oras 300 tuir padraun aviaun ne’e. Aero Díli rua ne’e to’o agora  foin halo oras 200 resin, tanba ne’e hakarak lakohi tenke aumenta tan oras. Ne’ebé haré to’ok se  merkadu ne’e di’ak  tenke aumenta tan aviaun ida iha tinan ida ne’e ka tinan oin, tanba  sei semo tan ba Tailândia to’o Filipina.

“Ita iha ne’e vô lokál laiha mak Oe-Cusse mesak de’it, tanba ne’e ita aumenta semo ba fatin seluk para ita bele taka malu hanesan halo subsídiu ba ida seluk, karik ida seluk pasajeiru ladún barak, entaun ida barak ne’e mak subsídia fali ida pasajeiru oituan ne’e,” nia esplika.

Nia informa, ba futuru sei aumenta tan vô ba Tailândia no Filipina, maibé depende mós ba merkadu, karik iha probabilidade hodi aumenta aviaun ida hodi semo direta ba maluk sira iha Korea, ida ne’e mós merkadu ida.

“Karik Maromak tulun,  sorte di’ak liu, la’o kapás ona tinan 30, Aero Díli iha programa hodi semo tan ba Europa,” Lourenço de Oliveira hateten.

Atu fó hanoin fali katak, Grande Lansamentu Aero Díli A320, realiza iha Otél Timor iha Segunda loron 23 fulan-Janeiru tinan 2023, ne’ebé partisipa hosi Primeiru Ministru VIII Governu Konstitusionál, Taur Matan Ruak.

Serimónia lansamentu no inaugurasaun aviaun Airbus A320 ne’ebé uza  Bandeira RDTL, halo  iha aeroportu internasionál Nicolau Lobato, Segunda (20/03/2023), ne’ebé Prezidente Repúblika José Ramos-Horta rasik mak halo inaugurasaun ba primeiru lansamentu ne’e.

Aviaun komersiál empreza Timoroan nian, Aero Díli ho Bandeira RDTL, Sesta (14/02/2025), tuku 17:00 Oras Timor-Leste, hala’o lansamentu vô direta hosi Díli ba Xiamen-Xina no husi Xiamen-Xina mai Díli.

Husi ne’e Aero Díli mós ofisialmente tula ona Primeiru-Ministru Kay Rala Xanana Gusmão no Prezidente Repúblika José Ramos-Horta ba serimónia ofisiál nasaun nian, liu-liu liga ho adezaun Timor-Leste ba ASEAN iha Malázia.

Reportajen ekipa Rafa.tl