Ouvir RAFA Ritmo, Voz e Coração de Timor
Sekretáriu Jerál FRETILIN, Mari Alkatiri ho Cidalia Nobre Guterres, espoza Saudozu Francisco Guterres "Lú Olo" fó omenajen no solidaridade ba família matebian Palomita iha rezidensia Matadoru, Díli, Kinta 19 Novembru 2026.
Díli, 20 Novembru 2026 (RAFA) – Sekretáriu Jerál Partidu FRETILIN, Mari Alkatiri, lamenta no preokupa ho kazu omisídiu hasoru joven feto Palomita Gusmão Guterres ne’ebé namoradu rasik mak hakotu nia vida liu husi sona mate iha Tasi-Tolu.
Fundador RDTL ne’e husu ba inan-aman hotu atu eduka oan-mane sira atu respeita feto sira.
“Akontesimentu ida-ne’e hatudu ba ita katak, hanesan aman, oan, inan, la simu realidade ne’ebé mak akontese, ha’u hatete ba ita-boot sira ema nia aman ne’ebé mak halo ba nia ne’e má-edukadu ne’ebé mak la mosu iha família, ha’u bele hatete katak família mak la eduka nia oan, sé família eduka nia oan karik la akontese buat ne’e,” Mari Alkatiri hateten ba jornalista bainhira fó omenajen no solidaridade ba família matebian Palomita iha rezidensia Matadoru, Díli, Kinta-ne’e.
Mari Alkatiri hateten Timor-Leste hanesan nasaun demokratiku, maibé laiha sentidu bainhira oan-feto sai laiha seguransa, laiha garantia fila ba uma ho vida.
Lider nasional ne´e hatutan sei dezafia polítika sira hotu-hotu, ba partidu polítiku sira, ba sira agora bara-barak hakarak ba kandidatu ba Prezidente saida mak sira hanoin ba buat ida-ne’e. Tanba eleisaun para tau ema iha ne’ebá, maibé povu kontinua lakon sira nia oan, lakon sira nia vida. Tanba ne’e lider sira tenke halo reflesaun kle’an ba atetude sira halakon ema seluk nia vida kontinua akontese iha Timor-Leste.
Mari Alkatiri hatete nu’udar Sekretáriu Jerál FRETILIN, nia fanu lideransa sira tomak atu fó onestidade hateke uituan kotuk, tanba restaura tinan 24 nia laran la’ós rezultadu aktu ida ne’e mak atu akontese.
“Ha’u ohin haree de’it ba joven ne’e nia oin, ha’u la augenta, ha’u mós iha beioan, ha’u mós iha oan, ha’u iha beioan idade hanesan joven, ne’e duni ha’u labele. Tanba ne’e ha’u dehan ba jornalista sira, ha’u mai iha ne’e la’ós de’it fó solidaridade, ha’u mai ne’e atu dehan ita tenke kore an husi krime sira ne’e hotu, tenke hakribe krime sira ne’e hotu, no tenke haburas fila fali liberdade respeitu ba vida ema hotu-hotu nian liu-liu dignidade oan ho beioan feto sira,” tenik Mari Alkatiri.
Sekretáriu Jerál FRETILIN mós konsidera kazu ne’e grave tebes, maibé la’ós úniku, no lakohi hahalok ne’e akontese loro-loron.
Jornalista: Juvinal Cabral dos Santos
Written by: RafaFM
Mari Alkatiri Lamenta ho Palomita Nia Mate no Husu Ina-Aman Eduka Oan-Mane Sira
todayNovember 20, 2026 10 2
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Copyright Rafa.tl - Desenvolvido por Justweb.pt