Marí Alkatiri Konsidera Vizita Prabowo Hametin Amizade no Bele iha Solusaun Ba Restus Mortais Luta-Na’in Ne’ebé Seidauk Hetan

Prezidente Repúblika José Ramos-Horta halo enkontru bilateral ho Prezidente Repúblika Indonézia Prabowo Subianto iha Istana Merdeka-Jakarta, 28 Agostu 2026.

Díli, 11 Setembru 2026 (RAFA) – Sekretáriu Jerál no Prezidente Interinu Partidu Frente Revolusionariu Timor-Leste Indepedente (FRETILIN), Marí Bin Amude Alkatiri hatete ho planu vizita Prezidente Repúblika Indonézia Prabowo Subianto mai Timor-Leste bele hametin amizade entre país rua no bele iha solusaun ba restus mortais luta na’in ne´ebé seidauk hetan too agora.

“Ha’u hanoin sé mak ukun de’it sempre husu dezde ha’u nia tempu, katak sira dehan Nicolau Lobato nia restus mortais la’ós ninian de’it, David Alex, Mauhudo, ha’u husu hotu ona sala iha ne’ebé, depois 12 Novembru sira nia iha ne’ebé. Ha’u hatene katak lidér sira atuál mós husu daudaun, ha’u husu la’ós hanesan problema ha’u husu ne’e hanesan asuntu ida ita tenke rezolve para ita nia amizade ne’e metin liu, ne’e mak ha’u nia forma husu ne’e la’ós atu kria fali problema, ne’e lae,” Marí Alkatiri  informa ba jornalista sira iha Díli, Sesta-ne´e.

Eis Primeiru-Ministru ne’e hatete iha  lideransa Prabowo Subianto nian  iha nasaun Indonézia, ne’e mak  oportunidade di’ak  atu husu restus mortais eroi sira nia ne’ebé uluk lakon vida iha tempu funu, maibé to’o ohin loron seidauk hetan sira nian isin mate.

Iha loron 28 Agostu 2026, Prezidente Repúblika José Ramos-Horta halo enkontru bilateral ho Prezidente Repúblika Indonézia  Prabowo Subianto iha Istana Merdeka Jakarta, informa katak Prezidente Repúblika Indonézia  Prabowo Subianto, sei vizita Timor-Leste iha tinan ida-ne’e nia laran.

Jornalista : Zita Menezes