MAPPF Propoin Millaun 22 USD Harii Zeti Ba Ró Ki’ik iha Tibar

Ministru Agrikultura, Peska Pekuária no Floresta, Marcos da Cruz.

Díli, 17 Agostu 2026 (RAFA) –Ministériu Agrikultura, Peska, Pekuária no Floresta (MAPPF) propoin subvensaun millaun 22 USD ba planu harii enfraestrutura zeti iha Tibar-Liquiça hodi fasilita   ró ki’ik  sira atraka  iha zeti refere.

Liuhosi  aprezetasaun proposta iha reuniaun Komité Polítika Planu no Programa Governu (PPG-15), Segunda ne’e,  Ministru Agrikultura, Peska Pekuária no Floresta, Marcos da Cruz, informa katak sira-nia parte propoin estimasaun orsamentu millaun 22 USD  atu harii infraestrutura zeti ida iha Tibar, ne’ebé sei fasilita ró ki’ik sira atu atraka diretamente no apoia governu iha kontrolu ba atividade peska.

MAPPF mós iha  planua atu instala infraestrutura no fasilidade apoiu iha área ne’e, inklui fasilidade atu produz jelu no infraestrutura seluk ne’ebé bele suporta atividade peska.

Ministru Marcos da Cruz esplika proposta zeti ne’e sei konsidera infraestrutura ho eskala ki’ik. Tanba ne’e, Primeiru-Ministru Kay Rala Xanana Gusmão, iha reuniaun PPG-15, sujere MAPPF atu halo revizaun kle’an ba montante orsamentu ne’ebé ministériu propoin ba Orsamentu Estadu 2027.

“Iha ne’e ita sei aprezenta fali ‘Detailed Engineering Design’, ne’ebé konsultan sira halo hela. Maibé importante liu mak ita hetan ona aprovasaun atu bele halo Zeti ida, hodi ita bele kontrola ró peska ne’ebé ita distribui ona, liuliu iha Kosta Norte,” Ministru Marcos da Cruz  hateten.

Nia dehan, atualmente, iha Díli seidauk iha fatin apropriadu ida ba ró ki’ik sira atu atraka, nune’e governu enfrenta difikuldade atu kontrola ikan ne’ebé sira lori mai, inklui distribuisaun ikan ba merkadu no kliente potensial sira.

MAPPF sei kontinua diskute ho Ministériu Finansas atu ajusta kustu ne’ebé propoin, tanba estimasaun  inisiál miliaun 22 USD  bazeia ba proposal dezeñu husi konsultóriu.

Ba orsamentu 2027, MAPPF hetan ona alokasaun orsamentu balun, maibé sei hein desizaun husi Komité Revizaun Orsamentu  no diskusaun kona-bá polítika no programa governu, inklui PPG-19, atu determina montante orsamentu finál ba Ministériu Agrikultura, Peska, Pekuária no Floresta.

Jornalista: Remigia Locatelli