MAPPF Planeia Reabilita Plantasaun Kafé Ektare 60.000 iha Munisípiu Potensiál

Plantasuan kafé iha Munisípiu Ermera. Imajen/dok.Espesiál

Díli, 02 Setembru 2026 (RAFA) — Ministériu Agrikultura, Peska, Pekuária no Floresta (MAPPF) planeia halo reabilitasaun ba área plantasaun kafé ektare  60.000 iha territóriu nasionál, liuliu iha munisípiu sira ne’ebé konsidera iha potensial ba produsaun kafé.

Ministru Agrikultura, Peska, Pekuária no Floresta, Marcos da Cruz  ba jornalista sira, Kuarta-ne’e,  iha Palásiu Gvoernu, hatete programa reabilitasaun ne’e objetivu atu hadi’a kualidade no kuantidade produsaun kafé iha Timor-Leste.

Tuir nia, reabilitasaun sei inklui renovasaun ba kafé-hun sira ne’ebé idade ona, kontrolu no prevensaun moras, nune’e óos replantasaun iha área ne’ebé apropriadu ba kultivu kafé.

“Agora komesa tama iha sistema agroflorestal, sistema ida ne’ebé kombina ai-hun boot, hanesan ai-mahon, kafé no ai sira ne’ebé ita bele kolleta kada tinan. Sistema ida ne’e presiza atu promove no tenke trata  halo didi’ak,” Ministru Marcos da Cruz subliña.

Ministru Marcos da Cruz  hatutan maski MAPPF enfrenta limitasaun iha orsamentu, ministériu kontinua buka apoiu liuhosi projetu no parseria ho entidade sira seluk.

Entre projetu sira ne’ebé fó apoiu ba programa ne’e mak Coffee and Agroforestry Livelihood Improvement Project (CALIP), ne’ebé fó atensaun ba dezenvolvimentu no hadi’a sistema produsaun kafé no agrofloresta iha Timor-Leste.

Marcos da Cruz hateten katak, liuhosi parseria ho CALIP, reabilitasaun no replantasaun kafé sei kontinua iha munisípiu sira ne’ebé iha potensial, hanesan  Ermera no Liquiça no mós iha munisipíu seluk tan.

“Iha tinan kotuk, komesa ho ektare 100 no  tinan ida ne’e mos kuaze hanesan, komesa ho ektare ne’ebé naton, hodi kontinua haré kualidade kafé iha Timor-Leste,” Marcos da Crus hateten.

Nia subliña katak kafé sai ona parte importante husi identidade no produtu agríkola potensial Timor-Leste, ne’ebé kontribui ba promosaun naran Timor-Leste iha merkadu internasionál, liuliu iha nasaun sira ne’ebé konsumu kafé Timor-Leste.

Tuir dadus ne’ebé RAFA asesu iha Projetu Coffee and Agroforestry Livelihood Improvement Project(CALIP), no mós Asean Development Bank (ADB) hatudu katak, Munisípiu Ermera konsidera hanesan potensia boot ba kafé, inklui mós iha munisípiu sira seluk ne’ebé iha potensia ba kafé maka hanesan Aileu, Ainaro, Bobonaro, Liquiça, no Manufahi.

Jornalista : Remigia Locatelli