Ouvir RAFA Ritmo, Voz e Coração de Timor
Timor-oan balun komesa investe iha setór agrikutura iha Oé-Cusse hodi kuda hare kontribui ba hamenus depedénsia fos imprtasaun.
Díli, 22 Outubru 2026 (RAFA) – Ministru Agrikultura, Peska, Pekuária no Floresta (MAPPF), Marcos da Cruz, enkoraza setór privadu nasionál atu investe no dezenvolve setór agrikultura hodi kontribui ativa ba hasa’e kualidade no kuantidade produsaun lokál. Nune’e, bele redús dependénsia ba produtu importadu.
Ministru Marcos da Cruz, Kuarta-ne’e, iha Palásiu Governu ba jornalista sira, informa iha kontestu Orsamentu Jerál Estadu (OJE) 2027, MAPPF kontinua tau prioridade ba dezenvolvimentu setór agrikultura, liu husi hasa’e kualidade produsaun lokál, moderniza atividade agríkola no fó apoiu ekipamentu modernu ba agrikultór sira iha territóriu nasionál.
MAPPF mós sei buka fasilita asesu agrikultór sira ba kréditu, hodi aumenta produtividade, hadi’a efisiénsia servisu no hametin kapasidade produsaun iha rai-laran.
Ministru Marcos da Cruz subliña katak dezenvolvimentu setór agrikultura labele depende de’it ba fundu públiku. Maibé, presiza partisipasaun ativa husi setór privadu no investidór sira atu aproveita potensiál agríkola Timor-Leste.
“Ita iha pursentu 75 agrikultór. Entaun, ita mós presiza hetan envolvimentu ka partisipasaun husi setór privadu, investidór no ema sira ne’ebé iha osan atu investe iha setór sira-ne’e, ho eskala ne’ebé boot no área ne’ebé luan. Uza mákina modernu sira-ne’e bele aumenta produsaun barak,” Ministru Marcos da Cruz hateten.
Nia afirma liu husi orsamentu Estadu, kontinua kria kondisaun favorável ba agrikultór sira, inklui harii no hadi’a infraestrutura bázika, hanesan kanál irigasaun hodi fasilita atividade agríkola iha área sira ne’ebé seidauk utiliza ho di’ak.
Tuir nia, investimentu iha infraestrutura no teknolojia agríkola importante tebes atu aumenta área kultivu, hasa’e produtividade no hametin seguransa ai-han iha Timor-Leste.
MAPPF iha estratéjia rasik atu jere no ezekuta OJE 2027 ho efisiénsia no efikásia, tuir lei, planeamentu bazeia ba programa, atividade prioritária no prinsipiu akuntabilidade.
“Governu buka atu fasilita no kria kondisaun iha terrenu, liu husi infraestrutura bázika no fó asisténsia téknika, atu bele aumenta produsaun. Ida-ne’e mak buat ne’ebé ita bele halo bainhira orsamentu aprova ona, hodi nune’e ezekusaun orsamentu bele efisiente no efikás,” Ministru Marcos da Cruz haktuir.
MAPPF iha nia objetivu prinsipál mak hasa’e produsaun agríkola iha territóriu nasionál, hodi responde ba nesesidade konsumidor sira no hamenus dependénsia Timor-Leste ba produtu ai-han ne’ebé mai husi rai-li’ur.
Relasiona ho asesu ba kréditu, Ministru ne’e informa katak MAPPF kontinua fasilita agrikultór sira atu bele asesu ba servisu finanseiru iha Banku Dezenvolvimentu Nasionál (BDN). Tanba, agora dadaun komesa loke ona atu fasilita agrikultór sira hetan asesu ba kréditu, hodi kontribui ba dezenvolvimentu iha setór sira-ne’e no fó insentivu, liuliu ba povu agrikultór sira.
Jornalista: Remigia Locatelli
Written by: RafaFM
MAPPF Enkoraza Setór Privadu Investe iha Agrikultura Hodi Hasa’e Produsaun Lokál
todayNovember 20, 2026 10 2
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Copyright Rafa.tl - Desenvolvido por Justweb.pt