Malázia Apoiu Timor-Leste Prepara Ba Prezidénsia ASEAN 2029

Ministru Negósiu Estranjeiru no Kooperasaun, Bendito dos Santos Freitas halo enkontru bilaterál ho Sekretáriu-Jerál Ministériu Negósiu Estranjeiru Malázia, Tan Sri Amran bin Mohamed Zin iha Díli, Kinta 03 Setembru 2026.

Díli, 03 Setembru 2026 (RAFA) – Sekretáriu-Jerál Ministériu Negósiu Estranjeiru Malázia, Tan Sri Amran bin Mohamed Zin, Kinta-ne’e hasoru malu ho Ministru Negósiu Estranjeiru no Kooperasaun, Bendito dos Santos Freitas, hodi reforsa no konsolida liután kooperasaun bilateral entre Malázia ho Timor-Leste.

Ministru Negósiu Estranjeiru no Kooperasaun, Bendito dos Santos Freitas ba jornalista sira, hatete nasaun rua ne’e kontinua reforsa kooperasaun liuliu ba dezenvolvimentu kapasitasaun institusional, rekursu umanu, investimentu, infraestrutura no tulun Timor-Leste ba preparasaun futuru Prezidénsia ASEAN iha tinan 2029.

Governante ne’e hatutan hanesan entidade hotu hatene Malázia mai apoiu Timor-Leste maka’as durante referendu to’o ohin loron. Malázia nia apoiu ne’e signifikativu no fundamental tebes ba Timor Leste.

“Ohin loron, ami haré sinál ida atu reforsa no konsolida liután kooperasaun entre nasaun rua,”  Ministru Bendito dos Santos Freitas hateten iha Ministériu  Negósiu Estranjeiru no Kooperasaun.

Ministru ne’e haktuir aleinde diskusaun kona-bá reforsu kooperasaun bilateral, vizita Sekretáriu-Jerál Ministériu Negósiu Estranjeiru Malázia nian mós inklui vizita ba edifísiu ka rai ne’ebé Governu Timor-Leste oferese ba Malázia atu konstrui Embaixada Malázia iha Timor-Leste.

Iha fatin hanesan Sekretáriu-Jerál Ministériu Negósiu Estranjeiru Malázia, Tan Sri Amran bin Mohamed Zin, hato’o agradesimentu ba Governu Timor-Leste, liuliu kona-bá kooperasaun iha área kapasitasaun, dezenvolvimentu institusional, dezenvolvimentu rekursu umanu, investimentu no infraestrutura.

“Ida-ne’e edisaun ida ne’ebé importante tebes ba ha’u, no ha’u hakarak hato’o ha’u nia agradesimentu ba hadi’a konstrusaun sira ne’ebé importante tebes,” Tan Sri Amran subliña.

Sekretáriu-Jerál Ministériu Negósiu Estranjeiru Malázia ne’e afirma sira  kontinua fó apoiu ba Timor-Leste hahú husi períodu referendu to’o ohin loron, no konsidera importante tebes ba nasaun rua atu kontinua hametin no konsolida kooperasaun.

Liuhosi vizita ne’e  nia aproveita diskute ho Ministru Bindito Freitas kona-bá pasu saida tan mak presiza halo hodi hametin kooperasaun entre Malázia no Timor-Leste, iha kontestu kooperasaun bilateral no mós iha kontestu kooperasaun ASEAN nian.

Iha kontestu ASEAN, Tan Sri Amran hatete Malázia toma ona nota kona-bá vontade Timor-Leste atu asume Prezidénsia ASEAN iha tinan 2029.

Jornalista: Cesarina de Carvalho