Loron Konsulta Popular Importante no Simbolikú Ba Timoroan

Kampaña pro-independensia iha ámbitu Konsulta Popular 1999. Imajen/Dok.

Jakarta, 29 Agostu  2026 (RAFA)- Prezidente Repúblika, José Ramos-Horta, kondidera loron konsulta popular, 30 Agostu 1999, nu’udár loron ida importante no simbolikú ba Timor-Leste hodi deside indepedénsia.

“30 Agostu ne’e loron ida emosional, loron ida simbolikú importante liuhosi ita nia diplomasia, Portugal, Organizasaun Nasoins Unida (ONU), Indonézia, hetan akordu husu ba povu Timor hakarak saida autonomia  ho  Indonézia ka  lae, Konsulta popular ne’e la’ós hakarak indepedénsia ka hakarak autonomia, simu autonomu espesial ne’e ka lae, 78% hatete la simu entaun signifiká hakarak indepedénsia tanba ne’e mak ita selebra,” Prezidente Repúblika Ramos-Horta ba jornalista sira iha Otél Borobudur, Jakarta, Sesta-ne’e.

Xefe Estadu adianta,  Indonézia momentu ne’ebá kumpri no hatudu nia sentidu estadu no onra ba kumpri akordu internasionál  ida-ne’e, nune’e liuhosi Prezidente Repúblika da- tolu B.J. Habibie ne’ebé fó obsaun ba povu Timor-Leste hodi hili  ukun rasik aan.

“Ita selebra dala ida tán aktu referendu ne’e referendu ne’e  la akontese arbiru, maibé mai husi luta tinan hirak nian laran mai husi lideransa, no sé mak konduz negosiasaun ne’e husi parte Timor mak maun boot Xanana Gusmão,” Ramos-Horta hateten.

Tuir ajenda ofisiál husi Governu liu husi Ministeriu Administrasaun Estatál (MAE), komemorasaun loron 30 Agostu ba dala-27 (30 Agostu 1999-2026) sei realiza iha Munisípiu Manatuto.

Jornalista : Zita Menezes/Elio dos Santos