Liga Timorense Segunda Divizaun Époka 2026, Fiel F.C Susesu Rekolla Vitória da-huluk Kontra Vila Atauro F.C

Eekipa Fiel F.C

Díli, 27 Maiu 2026 (RAFA.tl)- Liga Timorense segunda divizaun époka 2026 hahú abertura ho jogu entre Fiel F.C ho Vila Atauro F.C iha Estádiu Munisipál Díli, Tersa (26/05/2026).

Iha jogu ne’e Fiel F.C susesu rekolla vitória da-huluk hodi halakon Vila Atauro F.C  ho skor 1-0. Ekipa Fiel F.C hanesan klube ne’ebé mais esperiénsia iha Liga Futebol Timor-Leste (LFTL), tanba desde Liga ne’e sei amadora Fiel F.C kompete ona kompara ho Vila Atauro F.C ne’ebé foin promovidu husi terseira divizaun iha époka liubá.

Iha Jogu primeiru parte ekipa Fiel F.C no Vila Atauro F.C hatudu sira nia ritmu jogu ho lalais no lansa kedas ameasa ba malu, maibé ekipa rua iha liña defeza ne’ebé solidu no antisipa ameasa sira ho di’ak.

Iha jogu ne’ebé lao ho intensidade aas, ekipa Fiel F.C hetan uluk oportunidade dala-rua tuituir malu atu marka golu liu husi kontra atake lais, maibé sei falla tanba Vila Atauro F.C sei antesipa ho di’ak.

Ekipa rua kontinua hatudu sira nia jogu ida desezivu, maibé laiha golu ida mak akontese to’o jogu primeiru parte ramata.

Tama ba segundu parte, ekipa rua nafatin ho ritmu jogu ne’ebé hanesan, maibé Fiel F.C hetan uluk oportunidade iha minutu 67 liu husi jogadór Lourenço Ximenes hodi marka golu no lori nia ekipa lidera ho skor 1-0.

Ekipa Vila Atauro F.C la lakon vontade, kontinua hatudu performa tuir orientasaun ne’ebé iha no halo mos kontra atake makas inklui hetan oportunidade balu maibé oportunidade hirak ne’e la konsege rezulta golu to jogu segundu parte ramata.

Ho rezultadu ne’ebé iha ekipa Fiel F.C provisoriamente lidera grupu A Segunda Divizaun Liga Timorense époka 2026 ho pontu tolu no Vila Atauro obrigadu tenke tuur iha pozisaun ikus liu ho pontu zero.

Jornalista: Marito da Costa/Editór: Vito Salvadór