Lia-Na’in Suku Abo ho Estudate Sira husu Governu Loke Estrada no Konstrui Eskada Ba Fatin Istóriku Foho Matebian

Lia-na’in Suku Abo, Matebian, Manuel da Costa “Sakiak”.

Quelicai, 20 Agostu 2026 (RAFA)- Lia-na’in Suku Abo, Matebian, Manuel da Costa “Sakiak” hamutuk ho estudante sira husi Postu-Administrativu Quelicai husu ba Governu atu loke estrada no konstrui eskada ba fatin istóriku Foho Matebian hodi fasilita vizitante no turista sira halo vizita ba fatin istóriku ne’e.

Lia-na’in  husi Suku Abo, Matebian, Manuel da Costa “Sakiak” rekomenda atu Estadu proteje nafatin fatin istóriku Foho Matebian iha área Sorulai, Suku Abo, Postu-Administrativu Quelicai, Munisípiu Baucau.

Lia-na’in Sakiak hateten preparasaun ba fatin serimónia ne’e hahú besik fulan ida. Nia dehan fatin ne’e importante tebes tanba povu no FALINTIL entrega sira-nia ruin no ran iha ne’e.

“Ami lia-na’in sira  rekomenda ba estadu oinsá proteje nafatin, atu nune’e, fatin ne’e ema ruma labele estraga. Tanba fatin ne’e ami entrega tiha ona bá ruin no ran ne’ebé mate bá nasaun ida ne’e, ne’ebé estadu mai nafatin mai proteje hale’u buat ruma para animal la bele tama,” Manuel da Costa “Sakiak” hateteba jornalista sira iha fatin serimónia selebrasaun loron FALINTIL ba dala-51, iha Sorulai, Suku Abo, Postu-Administrativu Quelicai, Munisípiu Baucau, Kinta-ne’e.

Lia Na’in Sakiak mós hatutan katak bainhira parte ruma hakarak utiliza fatin ne’e ba atividade, tenke liuhosi prosesu lia na’in, autoridade lokál no estadu.

Nia dehan, Foho Matebian la’ós de’it ba Abo maibé ba Timor tomak tanba sai uma mahon ba FALINTIL no povu hotu-hotu iha tempu luta hasoru inimigu.

Iha parte seluk, Estudante Ensinu Sekundária Jerál Sentrál Quelicai, Ana Maria de Jesus, husu ba Governu atu hadi’a estrada no konstrui eskada ba fatin istóriku Foho Matebian no Kristu Liurai, hodi fasilita vizitante sira mai vizita fatin istóriku sira iha foho Matebian.

Estudante sira kontente tanba ba dahuluk selebrasaun aniversáriu FALINTIL ba dala-51 hala’o iha sira nia Postu-Administrativu Quelicai  no sira husu nafatin ba parte relevante sira atu kria kondisaun di’ak liután iha fatin históriku ne’e.

“Ami husu parte relevante sira tenke halo monumentu históriku no halo estrada ka eskada sa’e ba foho matebian leten hodi nune’e vizitante sira bele aumenta barak liután,” nia rekomenda.

Estudante ne’e subliña, bainhira iha infraestrutura di’ak hanesan estrada no eskada, ne’e sei ajuda turizmu istóriku iha Quelicai no fó mós oportunidade ba jerasaun foun atu hatene liután istória luta FALINTIL nian.

Serimónia iha Sorulai, Suku Abo ne’e sai momentu importante ba estudante sira atu hanoin hikas valór sakrifísiu FALINTIL nian iha luta ba independénsia Timor-Leste.

Jornalista: Juvinal Cabral dos Santos/ João Carlos