Lei Fó Dalan Ba Ramos-Horta Rekandidatu Ba Prezidente Repúblika Períodu 2027-2032

Prezidente Repúblika, José Ramos-Horta.

Díli, 08 Setembru 2026 (RAFA) –Membru Bankada oposizaun Frente Revolusionáriu Timor-Leste Indepedente (FRETILIN) ho Kmanek Haburak Unidade Nasionál Timoroan (KHUNTO) rekoñese lei fó dalan hela ba Prezidente Repúblika José Ramos-Horta hodi rekandidatu ba períodu ida tan 2027-2032.

Membmru PN husi Bankada FRETILIN, David Dias Ximenes Mandati ba jornalista sira iha Parlamentu Nasionál, Tersa-ne’e  hatete, bainhra Prezidente Repúblika ida asumi kargu Prezidente Repúblika iha períodu daruak tutuir malu,  lei sei la fó dalan atu rekandidatu aan ba períodu datoluk.

“Entaun kuandu ema ida iha primeiru no segundu nia prezidente tiha ona, maka nia hakarak halo terseiru períodu ne’e mak labele, mais bele husik tiha tinan ida depois tinan lima nia bele kandidatu aan fali ne’e bele, ne’e sei bele nia iha direitu no lei fó dalan hela,” Deputadu David Dias Ximenes Mandati hateten.

Iha fatin hanesan Xefe Bankada KHUNTO Deputadu Antonio Verdial de Sousa hatutan Kontituisaun Repúblika Demokrasia Timor-Leste (RDTL) fó dalan ba sidadaun hotu atu bele kandidatu no rekandidatu aan ba Prezidente Repúblika.

“Ha’u atu dehan katak lei  fó dalan ba sidadaun hotu atu kandidatu aan ka rekandidatu aan. Ne’e  iha dalan hela ne’ebé sidadaun sé de’it atu kandidatu aan feto ka  mane hotu-hotu iha direitu kandidatu aan no rekandidatu aan,” Deputadu Antonio Verdial de Sousa.

Nia hatutan eleisaun Prezidente Repúblika ba períodu 2027-2032 ne’e kestaun politiká  globalmente tanba ne’e  lidér sira sei haré ba asuntu ida-ne’e sé mak atu sai Prezidente Repúblika ba períodu  tinan lima  mai.

Deputadu ne’e afirma povu mak iha direitu atu  deside sé mak asumi knaar Prezidente Repúblika Demokratika Timor-Leste liuhosi votasaun ne’ebé povu ida-idak hili.

Iha Kontituisaun RDTL iha artigu 75,  kona-bá elejibilidade haktuir, sidadaun hotu  bele tuir kandidatura ba Prezidente Repúblika mak hanesan, sidadaun nanis, iha tinan mínimu 35, Ho kapasidade di’ak, ne’ebé hetan proposta husi sidadaun hili-na’in mínimu nain rihun lima.

Jornalista : Zita Menezes