Laiha Tradutór, Tribunál Suspende Julgamentu Primeiru Interogatóriu Ba Arguidu Na’in-16 iha Kazu Scam Call Centre Becora

Tribunál Díli suspende julgamentu primeiru interogatóriu ba arguidu na'in-16 iha kazu scam call centre iha área Becora, Díli.

Díli, 04 Outubru 2026 (RAFA)– Tribunál Judisiál Primeira Instánsia Díli (TJPID)  liu husi Juiz Yudi Pamukas, Domingu-ne’e, suspende julgamentu primeiru interogatóriu ba arguidu na’in-16 iha kazu scam call centre tanba laiha tradutór bá arguidu  ho nasionalidade Japaun, Kamboja no Taiwan.

Obserasaun RAFA iha  iha Tribunál Judisiál Primeira Instánsia Díli,  hale’u tuku 15:30 Otl, Prokuradór Matias Soares, ne’ebé  reprezenta Ministériu Públiku akompaña  husi Polísia Sientífiku Investigasaun Kriminál (PCIC-sigla portugés) aprezenta  arguidu na’in-16  hodi ho hahú prosesu julgamentu primeiru interogatóriu. Maibé,  bainhira Juiz Yudi Pamukas halo prosesu identikasaun bá kada arguidu, tradutór  laiha bá arguidu  ho nasionalidade Japaun,  Kamboja no Taiwan, ho  ne’e, deside suspende.

Hafoin Tribunál suspende julgamentu primeiru interogatóriu,  PCIC tau hikas alezema bá arguidu sira hodi  transporta fali  ba sela detensaun PCIC nian.

Iha Sesta, 02 fulan-Outubru ne’e, hale’u tuku 03:00 dadeer, Polísia Sientífiku Investigasaun Kriminál (PCIC-sigla portugés) detein sidadaun estranjeiru na’in-16 ne’ebé utiliza banner Polísia Japãun hodi halo atividade scam call centre iha Sola Otél iha área Au-hun, Becora, Díli.

Sidadaun estranjeiru sira ne’e, kompostu husi  na’in-hitu (7) ho  nasionalidade Japaun, na’in-haat Xina, Taiwan na’in-rua (2), Kamboja na’in-ida, no na’in-rua seluk kaptura ikus.

Iha operasaun ne’e, halo mós apreensaun  bá  objetu sira hanesan, laptop unidade ida (1), komputadór unidade rua (2),  telemovel,  aparellu Starlink, vintuiña,  no objetu seluk tan ne’ebé ekipa PCIC sei arolla hela.

Jornalista: Marcelino Tomae