Noticias

Labele Aproveita Arte-Marsiál Halo Timor-oan Baku Malu

todayNovember 4, 2026 77

Background
share close

Díli, 04 Novembru 2026 (RAFA) – Vise-Primeiru Ministru (PM) no Ministru Koordenadór Asuntu Sosial, no Ministru Dezenvolvimentu Rural no Abitasaun Komunitária, Mariano Assanami Sabino, hateten konflitu entre  membru arte-marsiál ne’ebe akontese durante ne’e,  iha ema ka grupu balu ne’ebé aproveita no uza arte-Marsiál hodi halo Timor-oan baku malu.

Vise-PM Mariano Assanami Sabino husu ba membru grupu arte-marsiál no arte-rituál hotu hamutuk konstrui nasaun, liu husi respeitu no valoriza malu, hodi labele fó fatin ba ema ka grupu ruma atu aproveita diferensa organizasionál hodi hamosu konflitu.

“Mai hamutuk, ita nia luta sei kontinua nafatin la’o ba oin, labele sai ema mak aproveita, soran ita, agora daudaun Governu atu reativa, derepente deit timor laran baku malu, ne’e katak ema mak aproveita,  ema mak uza hela,” hatete Assanami Sabino iha Metinaro, foin lalais ne’e.

Vise-PM ne’e hatutan, maske Timor-Leste iha arte-marsiál no arte-rituál barak, maibe ida-idak ho nia istória ida deit hodi lori Timor-Leste ba ukun rasik aan.

“Hau koñese imi hotu iha tempu rezistensia,  bainhira  ha’u fo juramentu  ba RENETIL iha Kediri-Indonézia, ne’e maior parte husi IKS mak iha ne’ebá. Ha’u sei eskola sekundáriu (SMA-sigla indonézia) koñese  PSHT husi Maun Abilio Mausoko (Dalas) tanba hela iha Santa Crus, joven barak mak treina, inklui mós tama iha grupu arte-rituál 77, 55, Santo António hahu klandistina, hodi bele iha kbiit, brani kontra Indonézia iha momentu ne’eba,” tenik  Assanami Sabino.

Governante ne’e apela ba juventude, evita violénsia no evita konsumu tua ho kuantidade barak ne’ebé bele halakon konsiénsia, inklui estraga propriedade ka halakon ema seluk nia vida.

“Imi ho imi labele halakon ida nia vida, oan ida, inan ida hahoris ho sakrifisiu so Maromak de’it mak determina ita nia distinu. Maibe, labele entre ita halo planu tanba ita lanu, ita oho tiha nia kolega. Favor ida, ho hakraik aan husu ba ita hotu evita hemu maka’ós, hodi lakon konsiensia  ba estraga sasan,” Mariano Asanami Sabino hateten.

Vise-PM mós  alerta ba polítiku sira evita lori materia arte-marsiál, no foka ba programa, ideia konkretu kona-bá dezenvolvimentu nasaun, promove polítika sivíl, respeitu no valorizasaun malu, no hametin liután koezaun sosiál no labele utiliza diferensa hirak-ne’e nu’udar instrumentu kampaña.

Jornalista: Marito da Costa

Written by: RafaFM

Rate it

Sé maka ita

Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.

Kontaktu sira
error: Content is protected !!