Labarik Rihun Ida-Resin Benefisia Ba Biblioteka Infantil iha Palásiu Prezidensiál

Diretora Biblioteka Infantil iha Palásiu Prezidénsia, Ana Isabel Gomes Amaral.

Díli, 14 Agostu 2026 (RAFA)– Diretora Biblioteka Infantil Prezidénsia Repúblika, Ana Isabel Gomes Amaral, informa labarik rihun ida-resin benefisia ba Biblioteka Infantil iha Palásiu Prezidensiál, hodi aprende no aumenta sira nia koñesimentu iha área oin-oin hanesan Inglés báziku, Portugés kona-bá CPLP no ASEAN, matemátika, lee no hakerek, artezanatu, dansa, fashion no múzika atu ajuda dezenvolvimentu kapasidade labarik sira nian.

Biblioteka Infantil iha Palásiu Prezidensiál ne’e funda direita husi Prezidente Repúblika José Ramos-Horta desde nia mandatu dahuluk hanesan Xefe Estadu iha Tinian 2011.

Diretora Biblioteka Infantil, Ana Isabel Gomes Amaral  ba RAFA, Kinta-ne’e, hateten, bibliopteka ne´e nia objetivu prinsipál mak atu fó espasu seguru ba labarik sira depois eskola.

Tuir nia observasaun, labarik sira hatudu progresu signifikativu iha área arte, liuliu iha múzika. Labarik balun ne’ebé tama iha biblioteka laiha baze iha múzika, maibé agora sira bele ona toka instrumentu iha eventu sira iha Palásiu Prezidensiál no iha li’ur.

Nia hatutan, labarik balun mós hetan oportunidade dezenvolve an iha área modelin, inklui rejistu ba ajénsia modelin sira no projetu ne’e mós kontribui ba dezenvolvimentu artista nasionál. Ana Isabel fó ezemplu artista Maria Vitória, ne’ebé hahú aprende iha Biblioteka Infantil iha 2011.

Iha 2016, Maria Vitória partisipa iha kompetisaun Indosiar no tuir programa The Voice Portugal.

Husi 2011 to’o Agostu 2026, total labarik ne’ebé partisipa iha projetu ne’e liu ona rihun ida no Númeru partisipante atual hamutuk 218 no bele muda tuir situasaun.

“Mudansa númeru partisipante ne’e relasiona ho fatór sosiál, inklui mudansa ba munisípiu no eviksaun. Labarik sira mai husi área oioin, hanesan Aitarak Laran, Becora, Taibesi, Tasi Tolu, Kampung Baru, Fatuhada no Bairru-Pite,” Nia informa.

Metodolojia aprendizajen ne’ebé uza mak sistema rotasaun. Labarik ne’ebé iha ona abilidade iha área ida, hanesan múzika, sei kontinua ba atividade seluk, hanesan artezanatu, atu garante katak hotu-hotu hetan oportunidade aprende área oioin.

Biblioteka Infantil la aplika rekizitu komplikadu ba labarik sira ne’ebé hakarak tama. Rekezitu sira mak kopia sertidaun batizmu no foto koloridu 3×4 tahan rua. Maibé, depois atividade remata, professor na’in-neen akompaña labarik sira ba han meiudia iha Kantina Matak.

Iha fatin hanesan, Estudante husi Eskola Centro Shalom Bebonuk, Demifri Morais das Neves, ne’ebé hanesan benefisiariu ba programa ne’e hateten, nia kontente ho oportunidade ne’ebé hetan tanba atividade sira gratuita.

“Aprende iha ne’e toka, kanta, dansa, modelin, Inglés báziku, Portugés, Matemátika no seluk tan. Sente kontente tanba gratuita. Dadeer ha’u mai aprende tiha iha ne’e, depois oras to’o, ami hariis iha ne’e, no lori ami ba han meiudia iha Kantina Matak, hotu ami prepara ba eskola,” Demifri Morais das Neves haktuir.

Demifri kontente ho maneira profesór Timoroan sira ne´ebé hanorin, tanba sira fó orientasaun ho di’ak no hanorin ho pasensia no sai hanesan guiadór ne´ebé tulun tebes iha prosesu hotu no Biblioteka Infantil Prezidénsia Repúblika kontinua sai hanesan fatin alternativu ba edukasaun, aprendizajen no dezenvolvimentu talentu ba labarik sira iha Timor-Leste.

Jornalista: Cristina Ximenes