Labarik Oé-Cusse Sira Halo Servisu Infantil iha Díli Hahú Menus

Labarik fa'an manu-tolun da'an iha estrada protokolu Supermerkadu Lider nia oin. Imajen/dok.Espesiál

Díli, 04 Setembru 2026 (RAFA)-Prezidente Autoridade Rejiaun Administrativa Espesiál Oé-cusse Ambeno (PA-RAEOA), Régio Serventes Romeia da Cruz Salu, hateten kazu labarik sira husi Oé-Cusse ne’ebé halo servisu infantil iha Díli  hahú menus hafoin intervensaun hamutuk ho Institutu Nasionál Defeza ba Direitu Labarik (INDDICA) no Provedór Direitus Umanus no Justisa (PDHJ), hodi halo sosializasaun no sensibilizasaun kona-bá  lei ne’ebé proteze direitu labarik nian.

Autoridade RAEOA ne´e hatete, uluk ne’e tendensiozu maka’as tebes, labarik sira mai husi Oé-Cusse, husik hela sira nia eskola, inan-aman mós la preokupa, piór liu inan-aman balun simu bolsa da mãe. Maibé, ho esforsu no kolaborasaun ho oinstituisaun relevante sira no bainhira tama tinan kotuk, RAEOA mós asina MoU ho INDDICA atu haré asuntu ne’e.

Aportil mós aviza, halo screening iha Díli  ho mós INDDICA halo iha fatin sira ne’ebé konsentrasaun labarik sira ema uza atu servisu infantil nian no konsege lori fila labarik balun ba hikas Oé-Cusse no balun ne´ebé ho família iha Díli kontinua eskola.

“Servisu forsada, labarik kiik-oan mai ita haruka dudu gerobak tun-sa’e. Dadus ne’e momentu ita hotu akompaña katak, Oé-cusse maiória mak fa’an. Agora ho intervensaun ho INDICCA, PDHJ iha terrenu nia númeru ne’e redus, sira nia maun ka tiu ne’ebé inan-aman haruka sira nia subriñu mai iha ne’e atu eskola, mais mai haruka nia servisu mós ekipa lalin ba hotu polísia depois sira presta deklarasaun,” hatete Prezidente Autoridade RAEOA, Régio Serventes Romeia da Cruz Salu ba jornalista sira iha Salaun MSSI, Díli, Sesta-ne’e.

Autoridade ne´e esplika, agora RAEOA servisu hamutuk ho INDICCA imprime  banner iha tasi ibun Portu.

RAEOA mós servisu hamutuk produz banner ne’e ho lian Baikeno. Depois halo nafatin sosializasaun nune’e labele akontese.

Prezidente RAEOA ne´e informa, iha Oé-cusse, servisu ho MSSI atu haree inan-aman sira, Xefe Suku sira informa tiha ona inan-aman ne’ebé simu ona bolsa da mãe, mais nia oan nia hatais la di’ak, satan atu abandona nia oan ba Díli tuir tiu no maun sira servisu iha Díli ne’e hapara.

Jornalista: Cristina Ximenes