Kuarta, Abertura Konkursu Públiku Juíz Ba STJ ho TR

Komisaun Rekrutamentu no Selesaun ba Juis STL ho TR, ne'ebé lidera husi Avelino Coelho no Carmelita Moniz.

Díli, 30 Juñu 2026 (RAFA.TL)- Komisaun Rekrutamentu no Selesaun, Avelino Coelho, Tersa (30/06/2026), informa Kuarta-ne’e, 01 fulan-Jullu 2026, hahú abertura konkursu públiku Juíz Supremu Tribunál Justisa (STJ)  ho  Tribunál Rekursu (TR) Timor-Leste.

Komisaun Rekrutamentu no Selesaun ne’e kompostu husi Prezidente komisaun rekrutamentu  Avelinho Coelho ho nia membru Carmelita Caetano Moniz no José Pedro Mariano Neves Camões.

Prezidente Komisaun Rekrutamentu no Selesaun, Avelinho Coelho liu husi konferensia imprensa iha edifisiu intalasaun STJ, informa  depois Timor-Leste to’o ona nia restaurasaun iha tinan-24, momentu  to’o ona atu instala kuatru  órgaun soberania supremu tribunál justisa.

Iha tinan 2021 Parlamentu Nasionál aprová tiha lei ba organizasaun judisiária ne’ebé prevé mós ona kriasaun komisaun, no iha tinan 2025 hamosu fali revizaun  ajustamentu hodi nune’e Prezidente Repúblika nomeia Prezidente komisaun rekrutamentu no Parlamentu Nasionál hili komisáriu na’in-rua hodi  kompoin komisaun rekrutamentu no selesaun juíz ba STJ no TR.

Bazeia ba kooperasaun entre estadu Timor-Leste no Portugal Prezidente Superiór Majistratura nia halo nomeasaun ba juís konselleru na’in-tolu hodi kompoin juri internasionál tuir ba lei ordenasaun judisiáriu ne’ebé mak aprovadu.

“Hodi nune’e mak ami halo uituan ajustamentu ba regulamentu avaliasaun kalendarizasaun mak ohin, permite ami fó sai públiku katak ho konferénsia imprensa ida-ne’e,  Kuarta-aban hahú ona nakloke odamatan ba interesadu potensiál kandidadtu ne’ebé mak konkore, bele hahú ona abertura ba konkursu,” Avelinho Coelho informa.

Nia afirma komisaun rekrutamemtu ida-ne’e sei administra de’it prosesu konkursu ne’e no juri mak iha podér tomak atu halo avaliasaun dokuméntal, fó ezame eskrita no entrevista.

“Hafoin konkursu mak juís remete ba komisaun rezultadu konkursu, komisaun depois halo relatóriu ba Prezidente Repúblika, Prezidente Parlamentu Nasionál no remeté relatóriu emvelope taka metin ba konsellu superior majistratura judisiál Timor  nian mak hafoin nia prazu másimu loron 30 bele nomeia ona juís konselleiru no juís markadores ne’ebé liu iha konkursu ida-ne’e,” Avelinho Coelho esplika.

Membru komisaun rekrutamentu, Carmelita Caetano Moniz  reiteira katak bazeia ba lei organizasaun judisiária ne’ebé fó knaar atu halo nomeasaun ba juri, bazeia ba ida-ne’e mak  Prezidente komisaun rekrutamentu haruka karta ba STJ Portugal hodi husu no  haruka naran juri husi ema na’in-tolu to’o na’in-lima mai Timor-Leste hodi halo selesaun ba prosesu rekrutamentu referé.

“Prezidente STJ Portugal hili duni juri na’in-tolu, juri sira ne’e mai husi juís konsellu sira ne’ebé reformadu tiha ona no sira ne’ebé esperiénsia barak no kle’an tebe-tebes,” Carmelita Moniz informa.

Komisaun Rekrutamentu no Selesaun mós informa katak hahú loron 01 fulan-Jullu 2026 sei hatama avizu ba iha Jornál da República hodi nune’e interesadu sira ne’ebé iha interese bele submete dokumentu eletróniku tuir portal ne’ebé mak prepara ona husi komisaun rekrutamentu.

Nia hateten, bele mós submete direitamente dokumentu sira iha Sentru Formasaun Juridiká Judisiáriu (STJ) Timor-Leste nian.

Jornalista : Zita Menezes/Editór: Vito Salvadór