KTON Reprezenta Timor-Leste Promove Kafé Espesiál iha HOTELEX Shanghai 2026

Kafe Timor Organiku e Natural (KTON) marka istória hodi sai empreza úniku husi Timor-Leste ne’ebé partisipa iha feira internasionál prestijiozu, HOTELEX Shanghai 2026. Imajen/Rafa.tl

SHANGHAI, RAFA.tl — Grupu Empreza Esperança Timor Oan (ETO) nia empreza subsidiáriu Kafe Timor Organiku e Natural (KTON) marka istória hodi sai empreza úniku husi Timor-Leste ne’ebé partisipa iha feira internasionál prestijiozu, HOTELEX Shanghai 2026, ne’ebé la’o husi loron 30 Marsu to’o loron 02 Abríl 2026.

Notísia Relevante : KTON Kualidade Espesiál no Sabor Orijinál Ne’ebé Diferente

HOTELEX Shanghai koñesidu nu’udar feira boot liu iha Ázia ba área ospitalidade, indústria bebidas, no ai-han. Eventu ne’e halibur espozitór hamutuk 3,500 no vizitante profisionál rihun 300 resin husi mundu tomak, hodi sai ponte prinsipál ba koneksaun entre produtór, kompradór, no espesialista kafé nian.

 Reprezentante  KTON, Joanico Oliveira hateten  KTON  nia prezensa iha eventu ne’e sai hanesan oportunidade vitál atu promove kualidade kafé Timor nian ba mundu. Iha feira ne’e, KTON aprezenta kafé espesiál ne’ebé iha karakterístika úniku, inklui realiza sesaun cupping no demonstrasaun brewing ne’ebé dada vizitante besik na’in rihun ida iha loron dahuluk.

“KTON nia partisipasaun ne’e hanesan oportunidade atu lori kafé Timor-Leste ba audiénsia globál no hatudu katak ita-nia rai iha poténsia boot atu prodús kafé ho kualidade aas,” subliña Joanico Oliveira.

Aleinde aprezenta produtu, KTON mós introdús abordajen foun iha prosesamentu kafé ne’ebé uza teknolojia modernu. Atu garante kualidade, KTON implementa sistema kontrollu ne’ebé rigorozu tuir protokolu Specialty Coffee Association (SCA) no hetan sertifikasaun Q Processing Professional husi Coffee Quality Institute (CQI).

Kualidade ne’e komprova ona ho susesu KTON nian iha tinan 2025, ne’ebé konsege esporta kafé espesiál hamutuk tonelada 11.8 ba Estadus Unidus Amérika. Agora, ho partisipasaun iha Shanghai, KTON kria hela dalan atu tama ba merkadu Xina ne’ebé dezenvolve hela ba beibeik.

 Vizitante sira mós foka sira-nia atensaun ba dezeñu booth KTON nian ne’ebé foun no kintu. Booth ne’e kombina elementu kultura Timor  liuhusi padraun no kór tradisionál ho ekipamentu modernu, hodi refleta vizaun KTON nian: foku ba kualidade no inovasaun maibé nafatin respeita ba identidade lokál.

 Liuhusi HOTELEX Shanghai 2026, KTON buka atu hametin koneksaun ho distribuidór no roasters internasionál. Objetivu boot mak atu kontinua haluan prezensa kafé Timor-Leste iha merkadu globál, hodi kontribui ba kresimentu indústria kafé nian no haforsa pozisionamentu Timor-Leste nian nu’udar orijen kafé espesiál ne’ebé rekoñesidu iha mundu tomak.

Ba futuru, KTON planeia kontinua haluan nia prezensa internasionál liuhusi parseria estratéjika no partisipasaun iha eventu global.

Ho foku ba kualidade, inovasaun no sustentabilidade, KTON hakarak kontribui ba kresimentu tempu naruk industria kafe Timor-Leste no haforsa nia pozisaun hanesan origem kafe espesiál iha mundu.

Reportajen Ekipa Rafa.tl