Krús Joven Internasionál Vizita Kreda Timor Durante Loron-ualu

Oráriu vizita Krús Joven Internasionál iha Kreda Timor durante loron-ualu. Foto/Komisaun Organizadora

DILI, RAFA.tl–Krús Joven Internasionál, Sábadu (23/08/2025), to’o iha  Timor-Leste no sei iha Timor-Leste durante loron-ualu (8), hahú hosi loron 23 to’o loron 30 fulan-Agostu 2025.

Notísia Relevante: Família Tenke Hametin Edukasaun Bázika iha Uma-Laran Hanesan Aliserse Bá Valór Morál

Krús Joven Internasionál sei to’o husi Taiwan mai Timor-Leste iha Aeroportu Internasionál Prezidente Nicolau Lobato, Dili, hale’u tuku 12:00 meiudia, hodi liubá Igreja Parókia Nossa Señora Imaculada da Conceção,  Katedrál, Dili.

Krús Joven Internasionál ne’ebé inisia husi  Papa  João Paulo II nu’udár “sinál dame no esperansa nian” sei hamutuk ho  sarani no joven katóliku Dioseze Dili nian durante loron rua (23-24/08/2025), no  iha loron 25 fulan-Agostu ne’e, kontínua vijita bá Munisípiu Bobonaro no misa enseramentu iha Dioseze Maliana.

Iha loron 29 fulan-Agostu 2025, sarani sira lori fali Krús Joven Internasionál ne’e mai Katedral Dili hodi  prepara bá fali vizita fali sarani no joven sira iha  Tailándia.

Durante vizita Krús Joven Internasionál ne’e iha Timor-Leste akompaña husi madre ida ho juventude katálika na’in-rua no jornalista ida husi Malázia to’o fila bá Tailándia.

Polísia Halo Koordenasaun Masímu ba Seguransa

Komandu Operasaun Polísia Nasional Timor-Leste (PNTL), Superintendente Xefe Polísia Justinho Menezes, liuhosi konférensia imprensa, Kinta (21/08/2025), informa Komandu PNTL halo ona enkontru dahuluk hodi atribui tarefa servisu sira ho Komandu teritoriál  sira, hanesan Komandu PNTL Munisípiu Díli,Mmunisípiu Bobonaru, Liquiça, Aileu no mós kamandu unidade sira, hotu hanesan Unidade Espesiál Polísia (UEP), Uinidade Patrolliamentu Fronteira (UPF), Unidade Polísia Marítima(UPM)  no mós ba diresaun sira hotu.

Hosi parte diresaun tránzitu no seguransa rodaviariu nasionál sei tau regra iha estrada  ka rota sira ne’ebé mak Krús Joven Internasionál  liu, hanesan husi Aeroportu Internasionál Preizdente Nicolau Lobato ba Igreja Katedrál Dili, inklui vizita  husi Dili bá Munisípiu Bobonaro.

Sita husi pajina ofisiál www.laityfamilylife.va  katak Krús Joven ida-ne’e koñesidu hanesan “Krús Tinan Santu nian”, “Krús Jubileu nian”, “Krús WYD nian”, “Krús Peregrinu nian”; ema barak hanaran “Krús Juventude” tanba fó ba joven sira atu lori iha mundu tomak, iha fatin hotu-hotu no iha tempu ne’ebé deit.

Iha tinan 1984, Tinan Santu Redensaun nian. Amu-Papa João Paulo II deside atu tau krús ida—símbolu fiar nian—iha altár boot Bazílika São Pedro nian sorin, iha ne’ebé ema hotu bele haree. Ba ida-ne’e, monta krús ai-boot ida, ho aas metru 3,8, tuir ninia hakarak.

Iha Tinan Santu nia rohan, hafoin taka tiha Odamatan Santa, Amu-Papa konfia krús hanesan ne’e ba foin-sa’e sira mundu nian, ne’ebé reprezenta husi foin-sa’e sira Sentru Internasionál Juventude San Lorenzo nian iha Roma. Ne’e mak ninia liafuan iha okaziaun ne’ebá: “Foin-sa’e doben sira, iha Tinan Santu nia rohan, ha’u konfia ba imi sinál loloos Tinan Jubileu ida-ne’e nian: Kristu nia Krús! Lori ba mundu nu’udár sinál Na’i Jezús nia domin ba umanidade no haklaken ba ema hotu katak iha de’it Kristu, mate no moris-hi’as, mak iha salvasaun no redensaun.”

Foin-sa’e sira simu Santu Padre nia pedidu. Sira lori krús ba Sentru San Lorenzo, ne’ebé sei sai nia uma baibain durante períodu sira ne’ebé nia la halo peregrinasaun iha mundu tomak.

Krús Tinan Santu nian (hanesan hanaran iha tempu ne’ebá) halo nia peregrinasaun dahuluk iha fulan-Jullu tinan 1984, hodi halo viajen ba Munique, Alemaña, ba Katholikentag (Loron Katóliku sira-nian). Hanesan de’it krús ai simples ida, iha inísiu ema la komprende saida maka espesiál kona-ba ida-ne’e. Maibé, neineik-neineik sira realiza katak Krús iha ne’ebá iha misaun ida, tuir Santu Padre nia hakarak.

Iha selebrasaun eukarístika finál iha estádiu sidade nian, ne’ebé partisipa hosi ema 120.000, tau Krús besik altár atu ema hotu bele haree. Hahú husi ne’ebá, Krús la’o ona iha estrada kilómetru barak—iha sidade sira, iha rai-li’ur, entre ema terus sira, ema dadur sira, ema kiak sira, no joven sira ne’ebé laiha esperansa—lori besik no konfortu ba ema hotu, nu’udár sinál dame no esperansa nian.

Reportajen Ekipa Rafa.tl