Kopa AFTL, Ramelau F.C Empata ho Saralima F.C ho Score 2-2

Jogu Ramelau F.C vs Saralima F.C. Imajen/ AFTL

Díli, 28 Maiu 2026 (Rafa.tl)- Atuál kampeaun Liga Futsal Timor-Leste Ramelau F.C obrigadu tenke fahe pontu hanesan ho klubu Segunda divizaun Saralima F.C iha jogu kontinuasaun Kopa Asosiasaun Futsal Timor-Leste (AFTL) hafoin empata ho score 2-2 iha faze apuramntu pool grupu E.

Jogu ne’ebé hala’o iha kampu futsal Kuartel Jenerál F-FDTL, Díli, Kuarta (27/05/2026), desde inisiu jogu ekipa rua iha ambisaun boot hodi produs golu, maibé sorti di’ak monu ba ekipa Saralima F.C hodi lidera uluk ho score 1-0 hafoin Francisco dos Reis halo auto golu iha minutu haat.

Sofre uluk golu ida la hamate espiritu kompetetivu Ramelau F.C, ho nune’,e tama ba iha minutu hitu Ramelau F.C konsege responde golu ida hodi hatuur score ba 1-1 liu hosi jogador Duarte da Costa.

Ho golu ne’e halo ekipa Ramelau F.C kontinua halo substituisaun hodi mantein ho intensidade no ritmu jogu ho velosidade, movimentu no enerjia ne’ebé aas, ho nune’e, tama ba iha minutu 13 Ramelau F.C produs tan golu ida hodi lidera hikas ho score 2-1 liu hosi jogador Francisco dos Reis.

Ho score refere halo tensi jogu komesa manas liután ba ekipa rua ne’e hodi lansa kontra atake ba malu, maibé to’o termina jogu priemeira parte score mantein 2-1.

Saralima F.C ne’ebé ho formasaun hanesan no la halo substituisaun ba jogador sira durante jogu halo intensidade jogo hamenus iha segunda parte tanba balun jogador komesa hatudu sinais kolen.

Ekipa Ramelau F.C konsege aproveita substituisaun ho di’ak hodi kontinua hatudu performa estável liu durante jogu no jogador sira sempre lori enerjia foun atu aumenta presaun, halo kontra-atake lalais no reforsa liña defesa hodi halo kontra atake. Maibé, tama ba iha minutu 33 Bendito Ramos marka golu hodi hatuur score ba 2-2.

Ho score refere jogu kontinua manas liután ba ekipa rua hodi lansa kontra atake ba malu Maibe to’o termina jogu Segunda parte score 2-2 mantein la muda.

Hosi rezulatadu empata ne’e hatuur ekipa Ramelau F.C ukun provizoriu tabela klasifikasaun pool (E) ho pontus ida, enkuantu ekipa Saralima F.C iha pozisaun daruak ho pontus ida.

Entertantu pool (E) kompostu hosi ekipa tolu mak hanesan Saralima F.C, Ramelau F.C, no Fiel F.C.

Jornalista : Davilio Valdameir/Editór: Vito Salvadór