Kopa AFTL 2026, Caesar Dante F.C Manan Boa Sorte F.C ho Score 4-2

Jogadór Caesar Dante F.C selebra vitória iha jogu kontra Boa Sorte F.C ho score 4-2. Imajen/AFTL

Díli, 30 Maiu 2026 (RAFA.TL)-Caesar Dante F.C susesu halakon nia adversáriu Boa Sorte F.C ho score 4-2 iha jogu kontinuasaun Kopa Asosiasaun Futsal Timor Leste (AFTL) faze apuramntu grupu H.

Jogu hala’o  iha kampu futsal Kuartel Jenerál F-FDTL, DÍli, Sesta (29/05/2026), dezde jogu kick off primera parte, ekipa rua hatudu jogu furak iha kampu ho ida-idak nia tékniku no tátika hodi lansa kontra atake ba malu.

Ekipa Caesar Dante F.C ne’ebé domina liu bola konsege produs uluk golu ida liu hosi kapitaun Denilson Migato, hodi muda score ba 1-0. Jogadór ho numeru kamizola 11 ne’e marka golu hafoin simu asistensia bola kruza hosi nia kompatriota Alexandre Da Cruz.

Ho score refere jogu sai manas liután ba ekipa rua ne’e hodi lansa kontra atake ba malu. Maibé tama ba iha minutu 14, Caesar Dante haboot liután score ba 2-0 liu hosi asaun jogadór Alexandre da Cruz.

Ho golu ne’e ekipa rua tenta lansa kontra atake ba malu nafatin, maibé to’o termina jogu priemeira parte laiha tan golu ruma mak akontese no ekipa Caesar Dante F.C mantein lidera ho score 2-0.

Kontinua ba jogu segunda parte ekipa Boa Sorte F.C ne’ebé mak sofre uluk golu rua iha primera parte hala’o jogu ho agresivu hodi lansa atake ba ekipa Caesar Dante F.C. Nune’e,  tama ba iha minutu 22 Boa Sorte F.C konsege produs golu ida hodi hamihis score sai 2-1 liu hosi jogadór Yuan Fredik.

Ho score refere halo intensidade jogu komesa manas liután, no tama ba iha minutu 27 Ivanildo Gonçalves  husi Caesar Dante F.C hatama golu ida hodi kontribui hasae score ba 3-1. Maibé, score refere la dura to’o tempu naruk tanba liu de’it minutu rua ekipa Boa Sorte F.C konsege responde golu ida hodi hamihis score ba 3-2 liu hosi jogadór Flaviano Alves.

Ho golu ne’e jogu sai manas liután ba ekipa rua ne’e hodi lansa kontra atake ba malu. Tama ba iha minutu 31 arbitu deside penalidade ba ekipa Caesar Dante F.C, hafoin liña defeza hosi Boa Sorte F.C komete erru iha área grandeál.

Jogadór Alexandre da Cruz ne’ebé sai ezekutor ba penalidade refere la konsege aproveita hodi marka golu tanba sei bele antisipa hosi guarda rede Boa Sorte F.C nian.

Iha minutu 39, Alexandre da Cruz konsege produs fila-fali golu ida hodi haboot liután score ba 4-2 to’o termina jogu Segunda parte vitória ba  Caesar Dante F.C.

Hosi rezulatadu vitória ne’e lori ekipa Caesar Dante F.C ukun provizoriu tabela klasifikasaun grupu H ho pontu tolu, enkuantu ekipa Boa Sorte F.C iha pozisaun ikus liu ho pontu zero.

Iha Grupu H kompostu hosi ekipa tolu mak hanesan Caesar Dante F.C, Boa Sorte F.C no M-VDL F.C.

Jornalista: Davilio Valdameir/Editór: Vito Salvadór