Kontrata Asesor Ne’ebe Alagada ho Krime, Opozisaun Konsidera Komisáriu Rui Pereira Hatama CAC Ba Rai-Kuak

Edifíriu CAC iha Farol, Díli. imajen/dok.espesiál

Díli, 23 Setembru 2026 (RAFA)- Opozisaun Timor-Leste husi Bankada Parlamentár Kmanek Haburas Unidade Timor Oan (KHUNTO) ho Frente Revolusionária Timor-Leste Independente (FRETILIN) konsidera Komisáriu Komisaun Anti-Korupsaun (CAC), Rui Pereira dos Santos, hatama CAC ba rai-kuak hafoin kontrata Asessór Internasionál Paulo Alexandre Gomes ne’ebé alegamente ba krime falsifikasaun dokumentu no koasaun iha kazu doping iha siklismu iha Portugal.

“Kazu ne’ebé komete husi señór ne’e, bankada rasik la hatene. Maibé karik ida ne’e mak loos duni, ha’u hanoin responsavel CAC tenke indenfika didi’ak sujeitu ne’e. Nune’e ba futuru labele hamosu fali dúvida husi sosiadade sira. Klaru se ema ida mak nia komete krime, depois ita la haré situasaun ida ne’e, depois ita mai rekruta nia hodi husu apoiu atu nia bele ajuda signifika katak ita rasik mak ke’e rai-kuak hodi hatama CAC,” Membru PN husi Bankada  KHUNTO, António Verdial Ferreira hateten ba jornalista  iha Parlamentu Nasionál, Kuarta-ne’e.

Deputadu António Verdial argumenta ho kualidade hanesan deputadu atu hatete, se karik ida ne’e mak komete duni husi sujeitu refere, klaru katak ne´e ke’e rai-kuak hodi hatama instituisaun CAC rasik. Tanba se ema ne’e komete krime ida depois ba uza ema ne’e hodi fó fali asesoria ba CAC, komisaun ida ne’ebé importante tebes atu tulun estadu hodi bele kria kondisaun ne’ebé di’ak ba nasaun ida ne’e importante presiza haree ema ne’e halo didi’ak.

Iha parte seluk, membru Bankada FRETILIN, Joaquim dos Santos hatete, se asesor ida ne´ebé manan konkorensia tenke iha moos ninia rejistu krimal husi nia país orijen no karik hetan alegasaun ba krimé ruma labele sai asesor ba CAC.

“Tanba se Komisáriu CAC ho ninia elentu sira ne’ebé halo rekrutamentu mak rekruta asesor ne’ebé ninia naran rejistu iha prosesu krime iha ninia nasaun orijin, entaun ita nia Komisáriu ne’e la respeita kritériu ne’ebé lei fó ba sira atu hodi implementa. Se ita nia Komisáriu lakohi hetan títulu ida ne’e, entaun nia tenke halo revizaun ba ninia desizaun, labele rekruta ne’ebé hetan rejistu kriminál iha Tribunál ninia país orijin,”  Deputadu Joaquim dos Santos hateten.

Inspetór-xefe Polísia Judisiária (PJ) Portugesa ida, ne’ebé akuzadu ho krime falsifikasaun dokumentu no koasaun iha kazu doping iha siklismu, hetan lisensa sein saláriu husi diresaun nasionál PJ atu servisu nu’udar asessór iha Komisaun Anti-Korrupsaun Timor-Leste.

Reportajen investigasaun CNN Portugal relata katak inspetór Paulo Alexandre da Silva Gomes hetan autorizasaun ne’e depois nia manán konkursa bá kargu asessór iha   Komisaun Anti Korrupsaun Timor-Leste.

Paulo Alexandre Gomes, ne’ebé to’o iha 2023 servisu iha Diretoria Norte bá PJ, alegadamente partisipa iha planu ida ho emprezáriu Adriano de Sousa, ne’ebé koñesidu ho naran “Quintanilha” no iha tempu ne’ebá sai prezidente klube siklismu W52-FC Porto.

Jornalista: Cristina Ximenes