Kontinua Pratika Jogu Ilísitu Scam Call Centre, PNTL Detein Xinés Na’in-14 iha Comoro

PNTL detein sidadaun Xina na'in-14 ne'ebé kontinua pratika atividade ilísitu scam call centre iha Comoro, Díli, Segunda-kalan, 28 Setembru 2026.

Díli, 28 Setembru 2026 (RAFA) – Polísia Nasionál Timor-Leste (PNTL), liu husi ekipa Diresaun Servisu Investigasaun Kriminal (DSIK) no Servisu Informasaun Polísia, kontinua halo buska no apreensaun ba sidadaun estranjeiru na’in-14 ho nasionalidade Xina tanba kontinua pratika atividade ilísita jogu scam call centre iha área Kampung Baru, Comoro, Díli.

Autoridade seguransa sira halo apreensaun ba didadaun hirak ne’e iha Segunda- kalan, haleu oras 10:30. Sidadaun Xina na’in-14 ne’e deskonfia halo hikas atividade jogu ilísitu, maski antes ne’e, sira envolve ona iha kazu  hanesan no hetan ona kondenasaun ba aktu sira tuir lei ne’ebé vigora.

Ekipa operasaun asegura kedas sidadaun hirak ne’e, inklui apreende objetu sira ne’ebé deskonfia uza atu hala’o atividade scam call centre, hanesan telemóvel hamutuk sanulu resin.

Hafoin kaptura, ekipa DSIK transporta sidadaun Xina na’in-14 ba Komandu Jerál PNTL atu hala’o prosesu identifikasaun, verifikasaun no investigasaun tuir prosedimentu lei.

Jornalista: João Carlos / Juvinal Cabral