Konsellu Ministru Aprova Rezolusaun Kona-Bá Medida Hametin Seguransa Públika no Prevene Violénsia

Palásiu Governu

Díli, 13 Maiu 2026 (RAFA.tl)- Konsellu Ministru aprova projetu rezolusaun Governu kona-bá medida sira atu hametin seguransa públika no prevene violénsia.

Desizaun ida-ne’e mosu hafoin insidente violénsia sira ne’ebé rejista iha semana hirak ikus ne’e iha fatin oi-oin iha nasaun ne’e, ne’ebé envolve grupu joven sira no ho konsekuénsia maka’as ba integridade fízika sidadaun sira nian, ba propriedade privada, no mós ba estabilidade hosi komunidade sira ne’ebé afetadu.

Insidente sira-ne’e sai grave liu iha loron 10 fulan-Maiu, iha Aldeira Poros, Mehara, Postu Administrativu Tutuala, Munisípiu Lautém, ne’ebé konfrontu ida envolve grupu joven sira ne’ebé  rezulta sidadaun ida lakon vida.

“Governu kondena ho forma klara no maka’as ba aktu destruisaun hotu-hotu ba sasán ne’ebé halo ema lakon vida, ofensa ba integridade fízika sidadaun sira-nian ka estragu propriedade privada, la haré ba sé mak autór ka ninia razaun sira.” Rafa.tl sita komunikadu ofisiál husi rezultadu reuniaun Konsellu Ministru, Kuarta (13/05/2026).

Entre medida sira ne’ebé aprova ona, Governu reafirma suspensaun temporáriu, iha territóriu nasionál tomak, atividade koletiva ensinu, aprendizajen no prátika arte-marsiál no arte-rituál sira, nune’e mós taka fatin sira ne’ebé uza hodi hala’o atividade hirak-ne’e. Medida ida-ne’e iha karakter exepsionál, proporsionál, no preventivu, ho objetivu atu hapara uzu aproveitamentu hosi atividade sira-ne’e nu’udár dalan ida hodi organiza aktu violentu sira.

Rezolusaun Governu ne’e mós determina reforsu operasaun patrullamentu husi Polísia Nasionál Timor-Leste iha territóriu nasionál tomak, liu-liu iha área no oráriu ho konsentrasaun boot tebes husi joven sira ka ho istória violénsia nian, no mós husu kolaborasaun husi líder komunitáriu, liu-liu Xefe Suku no Xefe Aldeia sira, hodi relata situasaun sira kona-bá suspensaun atividade ne’ebé relasiona ho arte marsiál no arte rituál.

Autoridades Munisípiu, rejiaun Administrativa Espesiál Oé-Cusse Ambeno no Autoridade Administrativa Ataúro nian tenke garante atu hatutan kedas informasaun sira-ne’e ba autoridade polísia kompetente sira.

Rezolusaun ne’e mós determina atu autoridade polísia sira kontinua no aselera investigasaun ne’ebé la’o hela relasiona ho insidente violénsia ne’ebé verifika tiha ona, no atu ninia autór sira tenke responsabiliza tuir lei.

Jornalista : João Carlos/Editór: Vito Salvadór