Konsellu Ministru Aprova Alterasaun Kona-bá Karreira Espesiál no Estatutu Guarda Prizionál

Guarda Priuzionál. Imajen/dok.MJ

Díli, 01 Jullu 2026 (RAFA.TL)- Konsellu Ministrus aprova projetu Dekretu-Lei ne’ebé aprezenta hosi Ministru Justisa, Sérgio de Jesus Fernandes da Costa Hornai, kona-bá alterasaun dahuluk ba Dekretu-Lei n. 10/2012, loron 29 fulan-Fevereiru, ne’ebé aprova Karreira Espesiál no Estatutu Guarda Prizionál nian.

Iha komuinikadu ofisiál ne’ebé Rafa.tl asesu husi Portal Governu, Kuarta (01/07/2026), revela katak objetivu hosi diploma ida-ne’e atu halo revizaun ba rejime Karreira Espesiál no Estatutu Guarda Prizionál, ne’ebé vigora dezde 2012, ho objetivu atu esklarese regras ba promosaun karreira, valoriza guarda prizionál  no reforsa efikásia sistema prizionál nian.

“Entre mudansa prinsipál sira ne’ebé prevee iha diploma ida-ne’e maka kria kategoria Xefe Guarda Prizionál Prinsipál, revee regras promosaun, aumenta komplementu remuneratóriu ba 50% hosi saláriu baze, fó direitu ba refeisaun durante turnu servisu, no mós kria rejime promosaun exesionál bazeia ba antiguidade ba guarda prizionál sira ne’ebé mantein iha eskalaun ikus hosi sira-nia kategoria durante tinan ualu liu, naran katak sira kumpre rekizitu legál sira. Diploma ne’e mós introdús ajustamentu ba rekrutamentu, formasaun no ezersísiu funsaun xefia nian.” sita komunikadu.

Ho revizaun ida-ne’e, nia objetivu mak atu rekoñese méritu no dedikasaun guarda prizionál sira nian, kria kondisaun di’ak liután ba progresaun sira-nia karreira no kontribui ba hadi’a seguransa no kualidade servisu ne’ebé presta iha estabelesimentu prizionál sira.

Projetu Dekretu-Lei ida-ne’e hetan ona deliberasaun iha sorumutu Konsellu Ministrus iha loron 13 fulan-marsu tinan 2024. Maibé, tuir ajustamentu sira ne’ebé mak introdús iha faze redasaun finál, liuliu atu armoniza rejime remuneratóriu, prevee direitu ba refeisaun durante turnu servisu, no estabelese rejime tranzitóriu ida ba promosaun estraordinária, presiza reavaliasaun no deliberasaun foun ba Projetu Dekretu-Lei ida-ne’e.

Jornalista: Zita Menezes/Editór: Vito Salvadór