Konfirmadu, Prezidente Prabowo Vizita Timor-Leste iha Tinan-Ne’e

Prezidente Repúblika, José Ramos-Horta halo enkontru bilaterál ho Prezidente Repúblika Indonézia, Prabowo Subianto iha Palásiu Prezidensiál iha Jakarta, Sesta 28 Agostu 2026.

Jakarta,  28  Agostu  2026 (RAFA)- Prezidente Repúblika Indonézia, Prabowo Subianto, konfirmadu, hlao vizita Estadu mai Timor-Leste iha tinan-ne’e.

Prabowo Subianto nia disponibilidade ne’e hato’o direta ho Prezidente Repúblika Timor-Leste, José Ramos-Horta iha enkontru Xefe Estadu na’in-rua nian ne’ebé hala’o iha Palásiu Prezidensiál iha Jakarta, Sesta 28 Agostu-ne’e.

Jornalista RAFA, Zita Menezes  ho Elio da Costa dos Santos husi Jakarta informa katak enkontru bilateral ne’e, Prezidente José Ramos-Horta lori mós laureadu Nobel  ba Paz sno Premiu Turin sira hosi nasaun oioin bainhira nia hasoru Prabowo iha Palásiu.

Prabowo mós konvida laureadu Nobel  ba Paz no Premiu Turin sira atu kolabora ho Indonézia tanba Prabowo  fiar katak, premiadu Nobel ba Paz ho Nobel Turin sira bele fahe sira-nia koñesimentu no esperiénsia ba peskizadór no akadémiku sira iha rai-laran.

“Ita seidauk iha data no loron loloos kona-ba Prezidetne Prabowo nia vizita ba Timor-Leste, maibé Prezidente Prabowo hakarak mai duni Timor-Leste antes tinan ne’e nia rohan. Data seidauk iha sira sei komunika, ha’u hatete ona ha’u rasik Prezidente, maun Xanana ami komfirme de’it data ne’ebé Prezidente Prabowo hili atu mai Timor -Leste no ami ajusta ami nia kalendáriu no prontu para simu iha kualkér loron no  kualkér momentu,” Prezidente Repúblika José Ramos-Horta, informa jornalista sira hafoin sorumutuk amigavel ne’e.

Ramos-Horta nia enkontru ho Prabowo la’ós  primeira vez, maibé antes ne’e hasoru malu uluk ona iha   Singapura, Kuala Lumpur, Malázia  no nasaun sira seluk.

Ramos-Horta subliña, Prezidente Repúblika Indonézia  Prabowo Subianto, importante  tanba bele hametin liután  relasaun diplomata entre nasaun viziñu Indonézia, inklui mós Timor-Leste iha relasaun diplomata di’ak ho nasaun Austrália, Xina, Estadu Unidu Amérika, Korea  Súl, India no mós nasaun Europa sira.

Iha enkontru bilaterál entre  Prezidente Repúblika José Ramos-Horta ho nia omólogu Prezidente Repúblika Indonézia (RI) Prabowo Subianto, to’o iha konklzusaun ida no kompromete hametin liután kooperasaun iha setór edukasaun no seguransa fronteira.

Prezidente Repúblika subliña Universidade Gajah Mada númeru ida iha Indonézia no Timoroan sira barak mak hala’o estudu iha ne’ebá, desde tempu Indonézia to’o Timor-Leste indepedénsia, no maismenus estudante Timor-oan hamutuk 3000 liu mak gradua ona husi ne’ebá.

“Setór seluk hanesan iha Fronteira, seguransa fronteira ne’e mós kooperasaun di’ak, setór komérsiu ita nia parseiru komersiál boot liu mak Indonézia, infelizmente ita laiha industria atu halo esportasaun,  maibé iha buat balu ne’ebé ha’u partisipa nu’udár apoiu,” Prezidente Repúblika José Ramos-Horta hateten. Remata