Ouvir RAFA Ritmo, Voz e Coração de Timor
Segundu Komandante Jerál Polísia Nasionál Timor-Leste (PNTL), Komisária-Asistente Polísia Natércia Eufrásia Soares Martins.
Díli, 20 Novembru 2026 (RAFA)— Segundu Komandante-Jerál PNTL, Komisária Asistente Natercia Eufrasia Soares Martins, afirma Polísia Nasionál Timor-Leste (PNTL) kontinua hakle’an investigasaun kona-bá kazu omisidu ne´ebé halakon Palomita Gusmão Guterres nia vida iha Aldeia 12 Outubru, Tasi-Tolu, Díli, Kusta 18 Novembru 2026.
Komisária Asistente Natercia Eufrasia Soares Martins ba jornalista sira iha Hotel Palm Spring, Fatuhada, Díli, sesta-ne´e afirma katak kazu ne’e presiza sai atensaun ba polítiku sira, atu haree fila-fali no halo revizaun ba lei sira ne’ebé vigora, hodi reforsa mekanizmu prevensaun violénsia hasoru feto no fó kompeténsia adekuada ba autoridade polísia atu hala’o sira-nia kna’ar.
“Hau-nia hanoin, ne’e kompeténsia polítika atu haree fila-fali lei sira ne’e, atu bele reforsa no responde ba situasaun atual iha ita-nia nasaun, no fó tan kompeténsia ba autoridade polísia atu bele hala’o sira-nia funsaun,” hatete Komisária Asistente Natercia Eufrasia Soares Martins.
Komisária Asistente Natercia informa simu ona informasaun kona-ba ema na’in-lima ne’ebé iha ligasaun ho prosesu investigasaun kazu mate Palomita Gusmão Guterres, inklui sira ne’ebé hetan notifikasaun atu fó sasin.
“To’o ohin loron, hau simu informasaun katak ema na’in-lima ona ne’ebé ita notifika, no agora dadaun sei hala’o primeiru interrogatóriu iha tribunál,” nia informa.
Segundu Komandante-Jerál PNTL mós apela ba komunidade atu bainhira hasoru problema ka situasaun ne’ebé bele hamosu konflitu no violénsia, tenke hato’o informasaun lalais ba autoridade seguransa sira, atu bele foti medida preventiva no evita akontesimentu ne’ebé bele lori konsekuénsia grave. No husu komunidade atu la iha ta’uk atu hato’o keixa ba autoridade polísia, tanba komunikasaun hosi komunidade importante atu ajuda PNTL halo intervensaun no asegura seguransa públika.
PNTL afirma kolaborasaun entre komunidade no autoridade seguransa sai elementu importante atu prevene violénsia no garante protesaun ba sidadaun hotu, liuliu feto no labarik sira.
Jornalista: João Carlos
Written by: RafaFM
Kona-bá Palomita Nia Mate PNTL Hakle’an Investigasaun no Husu Polítiku Sira Tau Atensaun Ba Revizaun Lei
todayNovember 20, 2026 10 2
Harii husi Nilton no Akita durante tempu susar sira hafoin referendu, Rádiu Rafa mosu nu’udar símbolu esperansa no rekonstrusaun iha Timor-Leste. Ida-ne’e maka estasaun rádiu dahuluk ne’ebé mosu hafoin independénsia, halibur foin-sa’e sira, habelar ksolok, no fó lian ba jerasaun foun, maski bainhira barak sei hela iha uma ne’ebé halo ho ahu-ruin hafoin destruisaun ne’ebé kauza hosi violénsia ne’ebé mosu hafoin referendu 1999, iha ne’ebé timoroan sira vota atu haketak hosi Indonézia no harii nasaun ida ne’ebé independente no livre.
Copyright Rafa.tl - Desenvolvido por Justweb.pt