Komunidade Afetadu Prontu Apoiu Konstrusaun Estádiu Internasionál iha Tasi-Tolu

Estádiu internasionál ne'ebé atu konstrui iha Tasi-Tolu. Imajen/Repro.FFTL

Díli, 15 Setembru 2026 (RAFA)—Komunidade afetadu uma-kain 400 ba konstrusaun estádiu internasional iha Tasi-Tolu deklara prontu apoiu programa Governu nian hodi kontribui ba prosesu konstrusaun kampu futeból internasionál ne’e.

Liuhosi diálogu ne’ebé   Sekretariu Estadu Asuntu Toponomia no Organizasaun Urbana (SEATOU), Sekretáriu Estadu Terras no Propriedades (SETP), Prezidente Autoridade Munisípiu Díli, Federasaun Futebol Timor-Leste (FFTL) ho komunidade afetadu sira,  Tersa-ne’e, iha Tasi-tolu, kominidade afetadu sira haktuir sira sempre  kolabora ho planu   Governu nian ba konstrusaun Estádiu internasionál ne’e.

Diretór-Jeral Terras no Propriedade, Lucas António da Costa, husu komunidade Tasi-Tolu atu koopera ho ekipa téknika iha prosesu levantamentu dadus ba uma-kain iha área rai ektare 12,5.

“Ami sei halo identifikasaun ka  levantamentu ba uma, ba ai-horis no rate medida por volta de ektare 12.5. Ne’e duni, ho diálogu ida ne’e, ami husu nafatin ho kolaborasaun, hodi koopera ho estadu, liu-liu ba ami nia ekipa tekniku,” Lucas Antonio da Costa hatete.

Membru ezekutivu Federasaun Futebol Timor-Leste (FFTL), José Luís de Oliveira, afirma Timor-Leste presiza iha estádiu internasionál ida ne’ebé reprezenta orgullu nasionál no orgullu sidadaun hotu.

Tuir nia, rai ne’e ukun aan ona, hakarak ka lakoni, Timor Leste mós tenke iha estádiu ida ne’ebe maka reprezenta orgullu nasionál no orgullu sidadaun hotu.

“Se ita estádiu laiha, kuandu jogu internasional sira, ita tenke ba aluga kampu iha ema nia  rai. Tanba ne’e, ami FFTL iha planu harii Estádiu ida ne’e ho apoiu husi FIFA,” hateten Jose Luis.

Iha fatin hanesan reprezentante Ministeriu Obras Públikas (MOP), Agostinho de Deus, garante Governu sei kompensa komunidade afetadu ba konstrusaun Estadiu padraun internasionál iha Tasi-Tolu.

“Governu laos la selu, husik ami teknika rasik orsida foti hotu dadus sei halo dezenu, no sei iha istimasaun depois mak intrega ba kada ne’ebe husu proposta. Ne’ebe kuandu foti ona dadus hare kolabora diak, bele sobu dadauk, ita boot sira nia dadus ami garantia,” Agostinho de Deus Subliña.

Francisco Lobo da Silva  nu’udar komunidade afetadu deklara sira aseita ho planu ne’ebé governu halo. Maibé, sira nia parte sujere ba governu atu halo levantamentu  dadus ho sériu bazeia ba dadus sira ne’ebé ekipa tékniku sira rekolla ona iha  tempu liu ba.

“Maun-boot Primeiru Ministru nia programa  hanesan joven no oan ida, ami nunka kontra ida, ami mós aseita mais atendementu ne’e tenki dignu,”   Francisco Lobo hateten.

Xefe Bairru João Paulo II, Marçal da Silva Martins haktuir bazeia ba planu ne’ebé Governu atu konstrusaun ba stádiu foun iha fatin refere komunidade sira hein kleur liu ona, no husu ba parte ekipa teniku ne’ebé dadaun ne’e rekolla hela dadus tenke bazeia mós levantamentu dadus ne’ebé tama ona iha Sistema.

“Ami bazeia ba buat sira ne’ebé sai hanesan baze ida ba Segunda faze atu halo tan levantamentu tanba ida ne’e mosu perguntas,”sujere Marçal da Silva.

Hatán ba kestaun ne’e Sekretáriu Estadu Terras no Propriedades Jaime Xavier Lopes klarifika katak Governu sei koordena ho parte tekniku sira ne’ebé rekolla ona bazeia ba levantamentus dadus sira ne’ebe sei utiliza rai ho ektare 12 resin ne’ebé afetadu ba projetu konstrusaun ne’e. Tanba ne’e, laiha problema ida, maibé terras nafatin buka meius oinsá situasaun ne’e bele sai di’ak.

“Ekipa sira mai halo levantamentu ba rai nia luan ektare 12 resin para tau tiha baliza, ita bele hatene uma sira ne’ebé ita-bo’ot sira ko’alia ne’e tama iha laran hotu ka lae. Se tama iha laran hotu prontu ita tenki foti dadus sira ne’e,” Jaime Xavier Lopes esplika.

Tuir estimasaun FIFA no AFC  nian katak projetu  konstrusaun stádiu foun Tasi – Tolu sei konstrui iha tinan oin ho durasaun tempu tinan ida  fulan lima ho valór orsamentu hamutuk millaun 4.2 USD.

Jornalista : David Gonçalves /Marito da Costa